E dua na i yau bula eratou dau veivuke tiko kina vei keda ena veikoro na Rotary Pacific Water for Life oya na kena dau vukei o keda na lewenivanua ena vakadrodroi ni meda wai ni gunu e savasava, baleta ni dua na ka dredre me da rawa ni bula tiko kina na lewenivanua.
Ena veika oqori, era sa baci laki vukei tale e dua na koro mai na yasana o Ra ena kena vakarawarawataki na medra wai ni gunu na lewe ni koro mai Nubumakita.
Era marau ka ra cakava e dua na kena soqo e na kena sa mai dola na paipo ni wai ka vakailavotaka na Rotary Pacific Water for Life.
E a dolava na paipo ni wai qo ko Lance Allen mai na kabani ni Fiji Water ka a vulagi dokai e na soqo oqo.
Na paipo ni wai qo e ratou a vakailavotaka saraga na Rotary Pacific Water for Life, ka tara vou kina na tobu ni wai kei na kena paipo ni wai ka rauta ni rua na kilomita na vanua e ciciva mai na paipo ni wai oqo ni bera ni qai mai wasewasei e na loma ni koro o Nubumakita.
E vakaraitaka o Allen ni ra a dau sega soti sara ni taucoko na nodra vakayagataki wai na lewe ni koro o Nubumakita e na gauna e liu e na vuku ni sa makawa na kena vakaso ni wai ka a caka e na 1970. Era dau vakila ni dau sega ni drodro vinaka na wai e na vula i mamaca se katakata. Era dau ogaoga na marama kei ira na gone ena kena vaqarai na wai ni gunu, na savasava, na sisili kei na vakasaqa ni dau sotavi na draki ni lauqa.
Ia e na gauna qo era sa marautaka na lewenikoro mai Nubumakita ni rawa ni ra sa vakayagataka na wai savasava ka drodro vakavinaka mai na veivuke levu mai na tabana ni Rotary Pacific Water for Life.
Ni a tauyavu na veivuke oqo ni Rotary Pacific Water for Life e na 2007 ka sa vakavotukana sara e na gauna qo ena nodra sa vukei rawa e rauta 200 na koro e na noda vanua me ra gunu mai na wai savasava bulabula e na kena tarai na nodra paipo, na taqe kei na veicakacaka tale eso me rawa kina ni vakadrodroi vinaka na wai ni gunu vei ira na noda era tiko ena taudaku ni koro vakavavalagi.
Na Rotary Pacific Water for Life e a vakailavotaka na kabani ni FIJI Water, Vodafone kei na Rotary International.