Eda dau rogoca tu ga, oqo eda sa qai mai vakadinadinataka. Eda dau sega ni vakila se taura tu vakabibi eso na nodra kauwai kei na nodra tagi na wekada era tiko ena veiyanuyanu ena vuku ni dredre ni veilakoyaki.
Qai da donuya tale na draki voravora, esa taura ga na tamata tagane ka vosota vakadede me da vorata kina na i lakolako balavu vakaoqo.
Ena Vakaraubuka sa oti, e sa mua na i lakolako ki Moce.
Oqo ena nona maliwai ira na tabana ni Nai Lalakai na kena laki cerevi ka marautaki na nodratou mai taura na i covi levu ni kirikiti ena noda vanua na timi ni Moce, Lau.
E osodrigi na veiwekani ena wavu ena nodra sa laki talaci na lewe ni timi, kei ira tale na veiwekani era na sobu ena veiyanuyanu tale mai Lau.
Esa usa na kako, tawani palasitika vinaka, koya e tawani kateni.
E rauta ni 200 na leweni waqa ena siga Vakaraubuka.
Rauta na 11 na kaloko ena sigalevu, e sa mua yani na i lakolako, me sa ia na soko.
Kena seva, ni sa lewa na Kalou mai lagi na draki, ka keimami sotava na ua kei na cagi kaukauwa ena bogi ni Vakaraubuka.
Kila na cava!! Keimami sa sega ni rawa ni takosovi Naselai, ka so esa votu mai vei ira na i tukutuku ni leqa e wai esa yaco oti.
E vinaka ni sa vakatulewa na kavetani ni neimami waqa na MV Sandy me keimami sa lesu tale mai ki Suva.
A sotava na waqa na cagi ka vakilai ni sivia na 25 na nota na kena kaukauwa ka salavata ena kena veitubuyaki na ua lelevu.
E vakadinadinataki ni dua na i wase ni pasidia era lomalomaca ena voravora ni soko. E voqa tale e loma ni waqa na i talanoa ni luvu na Uluilakeba.
Oqori na kena sa soli na i vakaro ni cagilaba ena 1973 ia a mani vorata ka tini lutu dromu koto voleka ena yanuyanu o Vatoa e na Ceva kei Lau.
E vakaraitaka o Viliame Sau e dua na turaga ni Moce ni dua na vakatulewa vinaka e vakayacora o Kavetani ena Vakaraubuka me sa mua lesu tale na i lakolako ki Suva.
Dina eda qai veiwalitaka ni da sa sobu bula e vanua , ia e dodonu me da na dau raica vakabibi na tikina vakaoqo, e kaya o Sau
Keimami sa mani lesu tale mai, me yacova na siga Moniti, na ika 23 ni siga keimami sa biubiu tale me keimami gole yani ki Moce.
Vakayacori tale na kacivi ni yaca.
Keimami sa vakavodo kei na neimami kako.
Me vaka ni siga Moniti, e draki rugurugua talega, na taubi na uca.
Esa dua na ka na noqu lomani ira na marama, ena nodra sa lomalomaca.
Na suasua ni kako, ka sega ni tuvaki vinaka sara na waqa vei keda na pasidia, ka da vakaloloma kevaka e draki suasua na gauna ni soko. Vei ira na marama eso, e sa toka volekati ira toka na nodra vokete.
Era vakayagataka talega na dela ni waqa me maroroi kina na nodra i yaya ka ra vakaruru talega kina.
Rauta na 2 na kaloko ena yakavi, keimami sa sasaga me keimami siviti Gau. E qai rawa oqori ni sa voleka na 5 na kaloko.
Qai mataka cake ni Tusiti, mera sa sobu na lako e Vanuavatu.
Era sa yaco yani e Vanuavatu ni rauta toka na 5 na mataka lailai ni Tusiti ka ra sa vakavodo na pasidia era sobu e Vanuavatu ena boto, e na kaukauwa ni kabu, era sega ni mani raici Vanuavatu tale na pasidia, era mani vakavodo tale mai.
E dua na marama oya e suasua kece na nona i sulu, ena nona gu me sa sobu ki nakoro, au sa qai solia vua e dua na noqu i sulu vakatoga me rawa ni mamaca toka kina na tolona.
Keimami sa veilomanitaka tu vakaoya na neimami i tosotoso, ka keimami sa masulaka kecega me keimami maroroi tiko ena liga ni Kalou bula ena i tosotoso ki Lakeba.
E dua talega na dredre e sotavi ni sega ni dua tale na yanuyanu e Lau e tiko kina na wavu, mai Lakeba duaduaga.
Vei ira na vo ni veiyanuyanu, era sa na vakavodo ga ena idini cavu , ka kele tu ga mai na daku ni tuba na waqa lelevu.
E vaka tu oya na dredre ni veilakoyaki era sotava mai na lewenivanua e Lau.
Me vaka e tukuna o turaganikoro mai Moce o Tevita Bese.
Sa rui ka vakaloloma ena gauna ni draki ca ka ra suasua na pasidia kei na nodra i usana, e kaya.
E vakadinadinataki ni turu na loma ni waqa ena taubi ni uca kei na levu ni ua.
Era se sotava mai na neimami Tua kei na Pu vakavica ka se yacovi o keimami ena gauna nikua, e dusimaka o bese.
Era veidavori na pasidia ena buturara ni waqa me ra vakacegu kei na nodra i binibini i yaya.
Ia era kalougata vakalevu na i lakolako oqo ni qai basika o ro- matanisiga ni sa voleka yani ki Lakeba.
Qai sivi na 15 na miniti na 11 na kaloko na siga Tusiti keimami sa kele yani ki Lakeba.
Rauta tale na 11 na kaloko ena siga Vukelulu era sa biuti Oneata me sa mua na i lakolako ki Moce.
Ni moce toka mada vakalekaleka, eda na qai veitomani tale yani ena macawa mai oqo, ena veiqaravi ena vakayacori mai na yanuyanu vakaturaga mai Moce.