Ko ira na gone era i solisoli mai vua na Kalou, ia e ka ni rarawa ni vuqa vei keda nai tubutubu eda dau biligi ira vakatikitiki na i solisoli me ra i murimuri tu ni ka e na gauna ni lotu, soqo kei veiqaravi tale eso eda veiqaravi kina.
Oqori na veika e a vakaraitaka ko Talatala Sainimere Degei na i liuliu ni Matawilivola ni Siga Tabu kei na Mataveitokani e Viti kei Rotuma e na nona vakaitavi e na dua na vuli ni veisusu kivei ira na i vavakoso e Muanikoso e na tabacakacaka ko Makoi e na Siga Tabu sa oti.
Era a yavutaka na nodra i vakamacala na marama i Talatala e na Vakaibalebale 22:6 Vakatavulica na gone e na sala e dododnu me lako kina:
Ia, ni sa qase mai, ena sega ni lako tani mai kina.
E kaya ko Talatala Degei ni vu ni leqa levu duadua eda sotava tu e na gauna e daidai oya na leqa ni noda veisusu vaka ca na i tubutubu.
Au sega ni kaya me ca oya, ia e dodonu me da vakabibitaka talega na nodra tuberi vakayalo e na Wilivola ni Siga Tabu me rawa ni na taqomaki kina na nodra bula e na veitemaki e so e dau yaco mai. Veitalia sara na i vakatagedegede ni vuli e ra yacova, se na koroi e tu vei ira, ke yali na Kalou e na nodra bula, era na leqa yarayara voli ga ka na dau temaki rawarawa, e kaya ko Talatala Degei.
E vakaraitaka na noda sega ni dau kauwaitaka me da volia na nodra i yaya ni vuli ni Wilivola ni Siga Tabu me vaka na i Vola Tabu, na peni kei pepa.
Se cava eda namaka me ra na lai rawata mai ni sega tu na nodra i yaragi ni vuli.
E tautauvata vinaka saraga kei na noda dau vakarautaki ira vaka vinaka na luveda ni bera ni laki vuli e koronivuli, eda yayanitaka na nodra i sulu ni vuli, vakarautaki na nodra i yaya ni vuli ka ra kau yani me ra laki vakavodoki.
Ia, na Wilivola ni Siga Tabu e dua walega na aua e na loma ni dua na macawa ka da qai vakaweleweletaka tu na ka bibi taudua e na nona susugi ka tuberi cake e dua na gone, e kaya.
Ni sucu mai e dua na gone, o koya e vulagi e na vuravura oqo. E na gadreva na i vakasala dodonu me na tukuni tiko kivei koya e na veigauna kece sara baleta ke sega, e tiko e dua e makutu me na tukutuku kivei koya, oya na vuni ca o Setani.
Meda na kakua ni kidacala na nodra vakayacora na gone na vei i tovo eso eda sega ni namaka.
E vakabibitaka na kena dau vakayacori na soqo, vakabibi na vakamau, e ka bibi na noda vakamacalataka kivei ira na bibi ni soqo vaka oqo baleta me kua kina na veibutakoci, veidrotaki kei na bukete dole vei ira na luveda.
E vuqa vei ira na gone qo e ra dara tu ga mai na vinivo kei na sote vakamatana (sports shirt), qo na i sulu ni soqo ka sega ni noda i sulu ni lotu na lotu Wesele. Na noda i sulu ni lotu oya na i sulu vulavula kei na i sulu roka dua (plain).
Vakaraitaka ni sega ni dodonu meda beitaki ira na luveda kevaka era bukete dole, butako, se kana mariwana baleta oya na i sau ni noda galu ka sega ni yadrava tiko na i tubutubu na noda i tavi.
Kevaka eda vakabibitaka na nodra tuberi mai vakayalo na i solisoli e na gauna ni nodra gone, e sega ni vakataratututaki ni na dei na nodra bula e na gauna e ra sa qase mai kina, ka sega ni vakayavalati vakarawarawa e na veitemaki.
Ia, e vakadeitaka talega ko Talatala Sainimere, ni se sega ni se bera e dua na ka kevaka e da via tekivu e daidai me da yadrava ka vakabibitaka na nodra tuberi vakayalo na luveda me rawa ni na kalougata kina na noda bula ni matavuvale e na veigauna sa tu e matada.