Ena soko siga tolu ki na yanuyanu o Moce e vakatakila e levu na veika eda dau taura tu ga vakamamada na tiko e Viti Levu.
Ena neitou soko wasa ena siga Moniti me gole yani na i lakolako ki Moce, au vakadinadinataka na veika era dau talanoataka mai ena talevoni se na veika era dau tukuna tiko na mata ni tikina ena bose ni yasana o Lau.
Au kila ni levu na gauna era dau mai veitalanoa kina e Suva ena vuku ni Bose ni Yasana e dua na ulutaga oqo me dua na nodra waqa vinaka me veiqaravi ena yanuyanu oqo.
Sega walega ni ra gadreva vakalevu na waqa vinaka me veiqaravi, e dua talega na ka bibi me sa vakarautaki vinaka talega na wavu mera laki kele yani kina vakavinaka na waqa.
E sega toka ni vinaka, ni ra talaci tu ga mai daku ni tuba na wekada kei na nodra kako, ka ra qai vodo idini cavu tale me ra yaco yani ki vanua.
Vakabibi ke sotavi tiko yani na draki suasua kei na kaukauwa ni cagi.
Oqo e vakadinadinataki ena neitou golegole ki Moce.
E dua talega na ka me na dikevi vakavinaka mai na tabana ni soko ni matanitu na i tuvaki ni waqa me vinaka tu, ni bera ni soli vei ira na veivuke vakailavo ni matanitu.
E dodonu meda qarava kece na noda i tavi.
O taukei ni waqa e sa tu na nona i tavi, ni vinakata me na soko ki na yanuyanu me vakataki Lau, Kadavu se Lomaiviti.
E dodonu talega me savasava ka vinaka na vanua era vakarurugi kina na pasidia, me vaka ga e dua na vale.
Baleta ni siga tolu tiko se siga rua tiko na tiko ena loma ni waqa, e sa dodonu me vakarautaki na i tikotiko eda tiko kina na tamata me vaka e dua na vanua eda taleitaka ni da tiko kina,
E ra vakaloloma na marama ena lomalomaca, kei na vokete e sa toka ga vakaoqo e yasadra.
E sega ni tiko na vanua e dau biu vinaka kina na noda kako, ka sa biu vata tuga kei na vanua eda dabe ka vakacegu toka kina na pasidia.
E dua na tabana oqo, na kena qaravi vakavinaka o ira na wekada mai yanuyanu, ena vuku ni waqa e ra veiqaravi e dodonu mesa na raici vakayalomatua.
Eda qaravi ira tiko na lewenivanua, o ira era veivuke tale tikoga ena kena tarai cake na noda vanua oqo.
E sa vinaka sara vakaoti na veiqaravi ni basi kei na motoka ena yanuyanu levu e rua, ia sa qai vo me laurai vakavinaka na veiqaravi vei ira na wekada era vakayagataka na waqa se na boto me sala ni nodra veilakoyaki.
Me vaka e tukuna o Tevita Bese, ni dredre era dau sotava oqo e se sotava mai o tubuna vakavica, ka se ra sotava tikoga na i tabatamata ena gauna oqo.
Na taro levu e tiko oya na vgauna cava beka ena qai kauwaitaki ka vakavinakataki na nodra sala ni veilakoyaki na wekada era tiko ena noda veiyatu yanuyanu e Viti.