ENA nona laki sikovi ira na noda ovisa mai na Vualiku na Komisina ni Ovisa, e vosa vakabibi sara o Birikadia Iowane Naivalurua ni dodonu mera na cakacaka vakaukauwa o ira na ovisa yalewa me ra vakadeitaka kina ni dodonu me soli vei ira na cakacaka era sa veiqaravi tiko kina.
Tukuna ni sega na veivakaduiduitaki na i tavi e soli vei ira na tagane se ki vua e dua na ovisa yalewa.
Tukuna ni soli vakararaba kece vei ira na ovisa na veika mera na cakacaka vagumatua kina ena veigauna kece ni nodra veiqaravi.
E vosa vakabibi o Naivalurua me ra na qarava kece na nodra i tavi e sa vakacolati vei ira, veitalia na i tavi cava e sa vakacolati vei ira, mera na qarava ena nodra i gu taucoko sara.
Tukuna o Naivalurua veitalia ke dua na ovisa e cakacaka ena kena qaravi na veilakoyaki, se draiva ga, e dodonu me na qarava ga vakavinaka na nona i tavi ena yalodina.
Ena macawa sa oti, e sega talega ni marautaka na Komisina na ripote ni ra sega ni qarava vakavinaka na nodra cakacaka na ovisa ena loma ni i matai ni va na vula ena loma ni yabaki oqo.
Tukuna o Naivalurua ni se levu tikoga na ripote ni nodra sega ni qarava vakavinaka na ovisa na nodra veivaqaqai, era sega ni qarava ka vakaotia vakavinaka na nodra ripote ni sa dau oti e dua na nodra qarava e dua na kisi.
Na veiqaravi raraba ni Tabacakacaka ni Ovisa mai na Janueri kina Evereli ena loma ni yabaki oqo, e vakaraitaka na Komisina ni sega ni taucoko, ka vakadreti ira na ovisa ni dodonu mera na tosoya cake na nodra i tovo ni veiqaravi. Mai Levuka, vakadeitaka na gusunivosa ni ovisa, o Ana Naisoro ni sega tiko na nodratou lori na tabana mai na koro makawa.
E tukuna ni dua na lori vou esa soli vei ratou me ratou vakayagataka, ia e qai coqa na lori, e sa mani kau tale mai kina e Suva.
Tukuna ni sa matata vakavinaka tu vei ira na ovisa na nona lawa na Komisina, oya kevaka e laurai ni dua na ovisa e sega ni qarauna vakavinaka na iyaya ni veiqaravi ni matanitu e soli vei ira, e na kau tani mai vei ira.
Tukuna o Naisoro ni sa tiko tale na i tuvatuva ni ovisa mai keya ena kena vakayacori tikoga na veiqaravi.
Ka sa tiko talega na veivuke mai vei ratou na tabana ni matanitu ena kena rawa ni soli na nodra lori kina tabana ni ovisa, kevaka ena gadrevi mai vei ratou na ovisa.
E vakadeitaka mai na veika oqo e vica vei ira na lewenivanua mai Levuka ena vuku ni kauwai oqo.
Eso na gauna e dau kerei na lori ni matabose ni tauni mai Levuka ena kena qaravi na nodratou i tavi na ovisa mai na koro makawa.
E vakadeitaka o Naisoro ni sa vakabibitaka o Naivalurua na nodra maroroya vakavinaka na nodra i yaya ni cakacaka na ovisa, ka me ra rawa nira vulica na bula ni yalomatua kei na mamaroroi.