E DUA na ka na nodrau marau na veitacini o Adi Naulumatua Vuniwaqa kei Adi Mailakeba Vuniwaqa e na nodrau sa mai butuka sara na vanua ka dabe tiko kina na Vatu Kaci ki Lau. Na vatu qo e vakatokai kina me Vatu Kaci ki Lau oya ena nona dau mai dabe kina o Saroni Cava me dau vakanananu lesu tale kina nona dela ni yavu ki Ulunikoro.
Au marautaka saraga vakalevu na noqu mai raica na vatu qo, e kaya o Adi Naulu.
Sa dede na neitou nakinaki tiko me keitou mai raica na vatu ka sikova na bulubulu nei neitou Tua, e kaya.
Io oqo keitou sa mai yaco rawa i Beqa, e kaya o Adi Naulu.
Na kena sikovi na Vatu Kaci ki Lau, e ratou a veivosakitaka ga na vuvale ka kawa mai vua na turaga ka sa mai davo koto e na koro ko Dakuni e na yanuyanu vakaturaga o Beqa.
E vakaraitaka o Taniela Naisua e dua vei ratou na turaga ni Nasaqalau ka veikau tiko ni o Saroni Cava Tui Lau e ulumatua ka sa mai davo koto e Beqa ena nona sa nakita me lako tani mai Ulunikoro e na vuku ni nona sa digitaki o tacina me taura nai tutu ni veiliutaki.
Na turaga qo o Saronicava e turaga sau ka tiko vua na mana, e kaya o Naisua.
Keimami na lako tiko mai qo keimami makubuna vakavica ka so vei keitou sa tiko mai Toga Matanisiga e na gauna qo, e kaya.
O Adi Naulu e sa vakaitikotiko tudei tiko mai Malevani e na vanua levu o Ositerelia.
Ia na lakolako ni kena laki samaki na bulubulu nei Tui Lau e ra a veivosaki kina na nona dra dina ka ra sa vakaitikotiko mai Togamatanisiga kei ira na tiko voli ga e Viti.
Ia e a mai vakavotukana na sasaga qo e na Vakarauwai sa oti e na kena sa mua nai lakolako vakaturaga ki Beqa e na koro o Dakuni me laki vakayacori kina na veika esa nakiti tiko.
Ni da raica na vatu qo e da rawa ni tukuna ni turaga oqo e dua na turaga levu ka momoqaqa, e na vuku ni vatu qo na Vatu Kaci ki Lau ni balavu ka levu. Ia, e da qai vakasamataka na nona rawa ni vakaduria me dau mai dabe kina ka kaci lesu ki na nona dela ni yavu. E na gauna qo ese dabe vinaka tiko na vatu qo e na gaunisala takoso mai Dakuni me gole vaka ki Lalati ena ruku ni koro makawa ka koro ni valu oya ko Vagadra.
E sa dua na ka na nodratou marau na makubuna vakavica na turaga qo ko Saronicava e na nodratou sa mai samaka na nona i bulubulu ka ratou ubia talega.