E SA na koti tiko na drauniului Radike Samo na tuwawa ni rakavi mai Ositerelia me baleta na nona kumuni i lavo tiko e na nona ka ni veivuke kina nona koro o Narewa mai Nadi.
E da kila vinaka ni a luvuci na vanua o Nadi ka bau oka talega kina na koro o Narewa.
Ia, e ratou veivuke talega na nona matatimi qaqa ni Queensland Reds e na kena kumuni nai lavo.
Ia e na laurai na levu ni lavo e kumuni ke lailai mai na takete e tiko oya e $50,000 na dola e sa na koti o Samo.
E vakaraitaka o Iliesa Tanivula na dauniveivakatavulici ni timi ni Nadi na nona vakavinavinaka levu vei Samo na nona nanuma tiko mai na nona vanua. E dua na ka vinaka e sa cakava qo o Samo, e dina ni sa laki qito tu mai valagi, ia e nanuma tiko mai na nona vanua ena nona via veivuke ena vuku ni waluvu qo e tara na noda vanua vakabibi o Nadi, e kaya o Tanivula.
E dua na ka ni veivakauqeti ni rawa ni nanuma tiko o Samo na nona vanua, e kaya.
E vakaraitaka talega o Tanivula ni rawa ni ra na vakauqeti na gone e ra qito ka ra sa laki rawati ira tu mai valagi me ra na nanuma mai na nodra vanua e na vuku ni waluvu.
E dua na ka vinaka e cakava qo o Samo ka sala ni dua na veivuke levu vakaitamera.
Nuitaki ni ra na vakamurimuria na mawe ni yavai Samo o ira na noda e ra tu mai valagi me ra na dodoliga mai e na vuku ni leqa e tara koto na noda vanua.
E sa veivuke na timi ni Queensland Reds e na kena tavoci na kumuni i lavo qo e na kena vakadonui me rua na lewenivanua me na dabe vata kei ratou na timi ni Reds e na nodrau sota kei na timi ni Stomers ka vaka kina na kena sainitaki na siqeleti ni qito ni timi ni Reds nei Samo mai vei ratou na lewe ni timi ni Reds ena qito kei na timi ni Brumbies ka vaka kina e 10 na kisi i yaya ni qito mai vei ratou na Reds.
E a soli talega e 10 na tikite ni sara lagasere vei Lady Gaga ka na vakayacori tiko na nona soqo ni lagasere e na Jiune, ka dua na tikite ni vuka ki Niu Ioka vua e lewe rua e na nodratou veivuke na tabana ni vuka ni Korea (Korean Airlines).
E dua talega na kena soli wale tiko na waini ka yacana na Angove wine me dua na yabaki.
E dua na vava ni qito rakavi nei Jams Horwill kei na siqeleti ni Ositerelia e na sotasota ni Tri Nations ka ra saini tu kina na dauqito ni Ositerelia.
Na sodrau na sota na timi ni Reds kei na Stomers e na Vakaraubuka qo e na rara na Suncorp Stadium ka na laurai kina na soqo ni kumuni i lavo qo.
Mai na macawa sa oti e sa kumuna rawa na timi ni Queensland Reds e $7240 na dola.