E RATOU vakacegui tale na timi qaqa ni Nadroga e na i ka va ni wavoki ni sotasota ni Digicel Cup e na vuku ni kena se vakavinakataki na rara mai Lawaqa ena vuku ni waluvu e a tara na muaira ni noda vanua.
E a vakaraitaka o Aporosa Tuqovu e dua na vakalesilesi ni valenivolavola ni rakavi unioni ni noda vanua ni se sagai tiko me na dua na kena i wali totolo ka me rawa ni laurai e dua na rara me rau na sota kina na timi e rua oya ko Nadroga kei Tavua. E na rawa ni yaco e dua na veisau, ia keitou se cakacakataka tiko ena gauna qo. Keitou sa veitalanoa tiko kei rau na timi e rua qo se cava na nodrau vakasama. Se bera ni dua na ka se rawa ni vakaraitaki rawa. O Nadroga e dodonu me rau na sota kei Macuata e na macawa sa oti, a ratou mani vakadadaro mai e na vuku ni a vakaleqa na nodratou vakavakarau na draki e a mai tara na noda vanua.
Ia na vanua e na vakayacori kina na i ka va ni rauni ni sotasota ni Digicel Cup e na qai macala malua yani ni oti na nodratou na bose na vakalesilesi ni rakavi ena noda vanua ena Vakarauwai mai qo.
E a dodonu me a vakayacori e na Vakarauwai qo na bose. E na tuvatuva sa tuvani oti tu na timi ni Macuata e dodonu me rau na sota kei na timi ni Lautoka mai na Subrail Park, Northland kei na timi ni Nadi e na rara na Gatward Park, Nadroga kei Tavua e na rara mai Lawqa Park, Ovalau kei Suva mai na Nasau Park, Rewa kei Naitasiri e na rara ni koronivuli mai Burebasaga, na timi ni Tailevu kei Vatukoula e na rara na Ratu Cakobau Park.