E RAU sa mai liutaka tiko e na gauna qo na i tuvatuva ni voidi e na sotasota ni Digicel Cup oya na timi ni Northland kei na timi ni Tailevu ka ni rau qaqa tiko mai e na nodrau qito kece ena yabaki qo.
Na timi ni Northland e a vakadruka na timi ni Lautoka e na rara na Churchill park mai Lautoka e na kai 30 kei 26 ka sa mai liu talega kina e na tuvatuva ni voidi ka dabe tiko e na 8 na voidi. Ia, na timi ni Tebara Bus Tailevu e a dabe tale tikoga e na 8 na voidi ka sa karua tiko ena gauna qo ni oti na nodratou vakadruka na timi ni Suva e na kai 16 kei 15 e na rara na TFL National Stadium.
E dina ni a mai druka na timi ni Lautoka ia e rawata talega e 2 na voidi e na vuku ni va na sikoa e tabaka rawa ka sa mai dabe tiko e na i ka tolu ni tutu oya e na 7 na voidi.
Na timi ni Nadroga e dabe tiko ena lima na voidi ka tautauvata kei na timi ni Suva, Vatukoula, Naitasiri kei Ovalau.
Na timi ni Vatukoula kei na timi ni Naitasiri e rau a bonisi e na nodrau tabaka e ono na sikoa e na nona sota kei Rewa e na kai 31 kei 8 kei na timi ni Ovalau ena kai 37 kei 17.
Na timi ni Macuata e dabe tiko ena ka ciwa ni tutu oya e na 2 na voidi, Nadi kei Tavua e na 10 kei an 11 ni dabedabe.
Ia e otiti ni dabedabe e tiko kina na timi ni Rewa ka se bera na kena voidi ka sa druka oti vakarua, ka druka ena matai ni rauni vei Lautoka e na kai 36 kei 3.
Na timi ni Macuata, Nadroga, Nadi kei Tavua e ratou a sega ni qito ena vuku ni waluvu e vakaleqa na nodratou rara.
Na macala ni ka tolu ni wavoki ni sotasota ni Digicel cup e sa koto oqo e ra.
Naitasiri v Ovalau
Ratu Cakobau Park
Naitasiri 37 (27) - Ovalau 17 (12)
Lautoka v Northland
Churchill Park
U20: Lautoka 21 (6) - Northland 8 (0)
Seniors: Lautoka 26 (12) - Northland 30 (17)
Suva v Tailevu
National Stadium
U20 : Suva 6 (6) - Tailevu 13 (6)
Seniors: Suva 15 (9) - Tailevu 16 (3)
Vatukoula v Rewa
Theodore Park
U20: Vatukoula 16 (11) - Rewa 8 (3)
Seniors: Vatukoula 31 (3) - Rewa 8 (3)