ENA veivosaki kei General Ali e na mataka ni siga ka tarava (8 ni Tiseba, 2001), eratou matataki ira kina na kai Amerika o Kanala Dalton Fury mai na Delta Force, o George mai na CIA kei Adam Khan na nodrau dau vakadewavosa. A sa toka dede vakalailai e Afganistan o George ka sa i koya e tiko vua na lewa ni milioni na dola ni Amerika ka dau soli tiko vei General Ali. A yaco yani e liu ki na vanua ni veivosaki o George me rau lai sota ka veikilai rawa kei Kanala Dalton Fury ni bera ni rau qai veivosaki o Dalton kei General Ali.
Na veivosaki, me vaka ga nodra i vakarau ni veivosaki na turaga ni Afghanistan, e caka ga e na rara e tautuba. E tevu e dua na ibe vutevutea me rauta ni ratou toka wavolita e lima ga na turaga ka toka vata na i tutuvi me ratou tutuvi kina ni taratarasui tiko na batabata. Eratou tu vakayawa yani mai gaunisala levu e tolu na ligaimatau ni Delta: ko i rau o Ironhead kei Bryan, e rua na satini metia ni Delta kei Kanala Al mai na CIA ka ratou dui roqo toka nodratou dakai vakamisini na AK-47 ka dudu tale tiko ga mai nodratou dui taga na sicini kei na i yaragi kacabote viritaki.
A yaco mai o General Ali kei na nona dauvakadewa, o Ghulbiar, rau luvata nodrau i vava ka rau dabe ni veilatai toka na yavadrau me vaka noda i vakarau ni dabe nai Taukei e Viti. E rau dabe veibasai o General Ali kei Kanala Dalton, e na imawi nei Dalton e dabe kina o Adam Khan ka dabe o George ena yasana i matau.
E tekivu o George ena nona vakaveikilaitaki Kanala Dalton kei Adam Khan vei General Ali. A vakalakala o General Ali vei Ghulbiar me taroga: Commandos? A takoso yani o George ena nona kaya vei Ghulbiar: Io, tukuna vua na General ni sai iratou oqo na lewe ni Commandos ni Amerika au a yalataka ni ra na lako mai. E lewe 40 tale era na qai yaco tiko mai ena siga nimataka. Sai ira oqo na matatimi era na mai vakasaqarai Osama bin-Laden.
Sa oti ga oya, sa tekivutaka o Kanala Dalton Fury na nona i tukutuku me vaka sa vakavakarau vinaka toka mai kina. E taladrodro na vakavakadewa nei Adam Khan me yacova sara ni lai oti, ka rau vakabauta ni sa ciqoma vakavinaka o General Ali na lewe ni nodrau i tukutuku. E na gauna taucoko e vakamacala tiko kina o Kanala Dalton, e osooso tiko o General Ali ena volavola ena dua nona i vola duka lailai.
Ia, ni oti ga na i vakamacala nei Kanala Dalton Fury kei na kena vakadewataki mai vei Adam Khan, sa sega ni qai galu o General Ali ni sa kaya: O kemuni na kai-Amerika, mo ni kakua ni torova na veiulunivanua. Na kemudou i wiliwili na Delta Force e sega ni dou na rawata mo dou vakamalumalumutaki ira na lewe ni Al Qaeda.
E vakuria o General Ali ena nona kaya: Na veiqaravatu era vakeba tiko kina na Al Qaeda sa sisinai ena i yaragi kei na kakana me veirauti kei ira ena vula i liliwa taucoko. Na i wase levu ni dauvala nei Osama bin-Laden ka ra lako mai na veimatanitu era bolea me ra mate e na vuku ni nodra vakabauta. Me vaka ga na nodra vakadrukai vakaca na lewe ni mataivalu vakaitamera ni Rusia ena yabaki 12 sa oti, na mataivalu talega ni Amerika ena sega ni rawati ira na Al Qaeda. A cava dou rawata na kai Amerika ka ra a sega ni rawata na kai Rusia e na loma ni tini na yabaki?
A sega ni namaka tiko yani o Kanala Dalton ni na tavuki totolo vakaoya na veivosaki. A tauri koya sara vakamalua, oti sa qai sauma: Adam Khan, tukuna vua na General ni ko ira na i lawalawa au kauti ira tiko mai sa ira na lewe ni commandos wararasa duadua e Amerika, era tamata liga totolo ka rerevaki sara na ka era rawa ni cakava ena loma ga ni dua na gauna lekaleka.Era sega ni mai vakatatalo se vakatakakana. Sa matau vei ira na vakasota kei mate!
A sauma tale mai o General Ali: O au au a liutaka na mataivalu ni idinia ena i valu kei ira na Rusia e na yabaki 12 sa oti. Au a vakaitavi ena tara ni veiqaravatu oya me i tikotiko kau kila tu vakavinaka. Ko ira na lewe ni Al Qaeda era a tawana tu e liu na vanua tou dabe tiko kina oqo. Na veibuca kei na veidelana ka ra wavoliti kedatou tiko oqo era kila vinaka. Na veiulunivanua era tiko kina oya, era vakaraici keda sobu tiko mai ena ivakadodorairai ka sega ni dua na ka e vunitaki e matadra. Au sega ni vinakata me dua na kai Amerika me mate eke, baleta au na tarogi kina. (E rairai leqataka tiko beka o General Ali na ivakatawa ni nona taga ke mate e dua na kai Amerika).
E kaya o Kanala Dalton: General kauti keitou na lewe vica oqo ki na i yatu e liu ni veiraravui me keitou vakaraitaka vei iko kei ira na nomu mataivalu na veika keitou rawa ni cakava. Ia ni ratou yaco mai na vo ni noqu i lawalawa ena siga nimataka, keitou na tomana ka toroya cake na veika keitou na cakava. Tovolei keitou mada mo rawa ni vakadinadinataka. E sega ni tiki ni neimami veiqaravi na veisa vosa wale tiko vakaoqo.
Sa veisautaka o General Ali nai ulutaga: Na ka ga au vinakata me vakalevutaki na vakalutu bomu mai macawa. (Ena gauna oya sa vula dua vakacaca tiko na vakalutu bomu ni waqavuka ni Amerika ka ra sa dro kina na Al Qaeda kei na Taliban ki na veiulunivanua).
Yaco e keya na vosa nei General Ali, sa takosovi koya o George: E sega ni rawa ni da vakalutu bomu tiko ka tawamudu. Keitou sa solia vakayauyau vei iko na i lavo kei na i yaragi ka kena i naki mo vakarusai ira kina na Al Qaeda, ia o sega ni via cakava na ka e vinakati. Kevaka ko sega ni tekivutaka qo, au sa na kaciva e dua na mataivalu taucoko ni Amerika me ra sobu eke e na loma ga ni dua na macawa, a tinia o George. (oqo e dua na ka e sega ni via raica o General Ali me yaco, ka ni ra na saqati koya ko ira na i liuliu ni veiyavusa ena loma ni nona yasana kevaka era sa sinai yani na kai Amerika).
Sa vaka e vosavosa i yalona o General Ali ena nona kaya: Kevaka e tini na udolu na sotia ni Amerika, ena sega ga ni rawa ni ra leuti tani mai kina ki tuba na Al Qaeda. Na ka ga e yaga e na i valu kei ira na Al Qaeda sa i koya me ra vakalutubomutaki ena veivanua era tiko kina.
A sauma yani o Kanala Dalton: General Ali, ena qai yaga ga na bomu kevaka eda sa kila rawa na takete, e sega ni rawa ni da vakalutu bomu tu ena veivanua kecega me vaka nomu nanuma.
Au na talai ira na noqu i lawalawa me ra lakova na veiulunivanua lelevu e tu mai muri oya, era na vaqara na veiqaravatu era tiko kina na Al Qaeda, na vanua era kana kina, moce kina ka vanavana tiko mai kina.
Era na walesitaka vei ira na pailate ni waqavuka ka na vakalutumi na bomu ena vanua sara ga era tiko kina. Solia ga vei keitou na veika au a sa kerea oti ka keitou na muduka na i valu oqo mo cegu o iko kei ira na kainomu, ka keimami cegu talega na kai Amerika
De dina beka! a kaya vakamalua o General Ali. Sa mai tini sara talega ekeya na veivosaki ka sa vakila ekeya o Kanala Dalton Fury ni na sega soti ni rawarawa na veivosaki kei ira na i liuliu ni Mataivalu Vakayasama me vakataki General Ali baleta ni vica vata na wa verevereya era tacori koto e loma.
Ni oti na veivosaki, sa tukuni vei iratou na kai Amerika, ni na taleva ena siga oya o General Ali na vanua ni veiraravui ka rawa vei iratou me ratou gole vata kei koya. Ni ratou sa vodo e na lori, a tarogi Adam Khan lo o Kanala Dalton se cava soti a vakavola tiko o General Ali ena gauna ni veivosaki, a sauma ga o Khan ena nona kaya: E sega sara ga ni dua na ka lailai e bau vola. Sa kila sara ga e keya o Kanala Dalton na veilecayaki e tiko vei ira na i liuliu vakayavusa vakataki General Ali.
Ni ratou se bera ni yacova yani na vanua era tiko kina na lewe ni mataivalu nei Ali, eratou sa raica na kai Amerika e dua na i lawalawa levu ka vaka era gole mai na veimatanitu.
E kerea o General Ali me kele mada na lori ka me na vosa mada vei ira na tu oya.
E ratou sega ni sobu na kai Amerika, vakalailai eratou sa siqema ni o ira oya era dauvolaitukutuku ka dauveitaba ni niusiveva, walesi kei na retio yaloyalo mai na veimatanitu.
Sa sega ni qai bera o Kanala Dalton, ni sa naulu na lori ka ratou drutia lesu ki na nodratou keba. E dua na marama ni Valagi a muri iratou ena kena totolo ena nona motoka, ia e tarovi koso ni sa butuka vakasauri na bereki o Kanala Dalton ka lade ki tuba e dua na sotia nei General Ali kei na nona dakai vakamisini me vakarereya na marama oya. Ia o General Ali kei na sotia oya, e rau qai dui vaqara lesu nodrau gaunisala ki na keba.
Ena bogi oya, sa vakayacori kina na veivosaki e na rumu levu ni CIA. Sa vakadewataki vei General Ali nodratou sega ni vinakata na kai Amerika me ratou raici se tabaki mai vei ira na tabana ni i tukutuku mai na veimatanitu.
E kaya o General Ali ni sa na raici na tikina oya.
E vakabibitaka o Kanala Dalton vei General Ali ni sa rui bibi me kauti iratou voleka sara ki na vanua era tiko mai kina na meca, me ratou raica na i tuvaki ni vanua me rawa ni ratou mai vakarautaka na i tuvatuva ni nodra kabai ka ravuti.
Ni ratou se veivosaki tiko ga, sa curu botolaki yani e dua na turaganivalu nei General Ali me lai vakaraitaka na i tukutuku ni veiraravui ena siga oya.
Era vakalala e tolu na qaravatu ka ra vakamatei ira na Al-Qaeda.
E mate talega vei ira e so, ia ko ira na bula era sa votai vakavinaka ena ise ni i valu (na i yau kei na kakana). Era sa suka lesu mai ni sa bogi.
A taroga na turaganivalu oya o Kanala Dalton: A cava dou sega ni taura dei tiko kina na veivanua dou sa rawata? A cava tale dou sukava mai? E rai vakababa vei General Ali na turaganivalu ka kaya: Keimami dau suka mai ni sa bogi, ka ni buto ka rerevaki vakalevu ena bogi.
Eratou sa qai kila e muri na lewe ni Delta ni ko ira na lewe ni veiyavusa, era dau vala ena siga e na kena kaukauwa taucoko, ia ni sa dromu ga na siga, era sasaga sobu kece tale mai ki na nodra keba ka ni donumaka tiko na vula ni lolo na Ramadan ka 30 na siga na kena dede.
E dua vata tiko ga na i Vola Tabu ka dua ga na kalou eratou vakabauta na mataivalu vakayavusa ka vakakina ko iratou na lewe ni Al-Qaeda.
Kena duidui ga, ni gauna eratou siro sobu mai kina na mataivalu vakayavusa me ratou mai kana ka vakacegu, era taura lesu tale na lewe ni Al-Qaeda na vanua vata ga era a se qai rawata na mataivalu vakayavusa e na siga oya.
Ena siga ka tarava, eratou sa baci lai tekivu vou tale mai ruku ni ulunivanua na mataivalu vaka yavusa.
Sa rauta bagi me sega ni toso tiko na i valu nei General Ali!
Ni sa vakarau moce tiko o General Ali ena bogi oya, sa tukituki e nona katuba o Kanala Dalton. E kaya na yadra ni sa sega ni kena gauna oya me vakasosataki kina nona i liuliu, ia e kaya vua o Kanala Dalton ni kerea ga e dua na gauna lekaleka.
E kauta tiko yani o Kanala Dalton e dua na i yaragi ka sega tale ni dua na mataivalu e vuravura sa tiko vua e na gauna oya. Aya na matailoilo ni bogi ka rawa kina vua me raica na ka kece e loma ni butobuto loaloa me vaka ga na rai ena sigalevu tutu.
A vakamacalataka vakamatailalai ni bera ni qai vakatokara vei General Ali ka kerei koya me curu mada ki tuba ka vakararai. Sa ka levu na qoroqoro nei General Ali.
Ia a kaya vakamalua ga vua o Kanala Dalton: Oqori na i yaragi keitou na kunei Osama bin-Laden rawa kina ena bogi buto, ia, ena sega ni raici keitou rawa o koya.
Ena qai kuri tale yani.