NI SA vakasalataki tiko ena macawa oqo na dauvolivoli ena kena dau vayagataki eso na nodratou veiqaravi na kabani ni talevoni veikauyaki ena noda vanua, ka me da qaqarauni ena so na nodrai vadi.
Ena gauna oqo se ratou vakadikeva tiko vakamatalailai na matabose nai tukutuku ka ratou dau tabaka na kabani ni talevoni veikauyaki ena noda vanua, ka vakatalega kina o ira na dauniveiqaravi tale eso, era dau taba i tukutuku taka na nodra veiqaravi ka sega ni dau maucokona na veiqaravi e ra solia. Ena vuku gona ni leqa oqo e vakamamasu tiko kina na Matabose ni dauvolivoli (Consumer Council of Fiji) vei kemuni na dauvolivoli mo ni wilika vakavinaka nai tukutuku ka ra dau tabaki tu me baleta edua na kalougata o na rawata ke o volia edua na veiqaravi se dua na ka.
Ena macawa sa oti, e ratou vakauta wavoki na kabani ni talevoni veikauyaki na Vodafone e dua nai tukutuku ena veitalevoni ena noda vanua era vakayagataka tiko na nodratou veiqaravi, ni kalougata ni 7c/qiri ki dua ga na vanua i valagi, ena mai cava tiko ena 7am na mataka lailai ni Moniti nai ka 27 ni Jiune, 2011.
Ia qai raica na Matabose ni siga tarava, oya na Tusiti nai tukutuku ni kalougata oqo e sa tabaki tikoga ena nodratou website na Vodafone ka toqai toka kina na vosa oqo vakaperitania Promotion valid until further notice.
E ratou qai kauta laivi ga o Vodafone nai tukutuku oqo ena gauna e qai curu yani kina na veivosaki oqo na Matabose ni Dauvolivoli me tukuna vei ratou ni sa cala tiko na nodratou se tabaka tikoga nai tukutuku ni kalougata oya.
E qai kuria tale na leqa ni tukutuku oqo ni ratou sega ni vakamatatataka na Vodafone se 7c oqo e sau ni dua na sekodi, se 7c vei ya 30 na sekodi se 7c dua na miniti.
Sa qai mai vakadodonutaki ga nai tukutuku oqo ena gauna e curu yani kina na Matabose me vakaraitaka na tawa dodonu ni nodratou itukutuku tabaki, ka sa ratou qai vakadodonutaka ni 7c ya e 7c vei ya 30 na sekodi.
E sega walega ni ratou cala ena leqa oqo na Vodafone.
E mai laurai talega vei ratou na kabani na Inkk ena dua na kalougata vakatokai tiko vakaperitania Its free with Inkk ka mai cava tiko enai ka 8 ni Jiune, 2011. Matai, sega madaga ni dua nai tukutuku e vakau vei ira na vakayagataka tiko na Inkk me tukuni vei ira ena gauna cava ena mai oti kina na kena vakayagataki na kalougata oqo.
E sa kilai levu tu ni dau tekivuna e dua na kalougata o Inkk, e vakayagataki kece na gaunisala ni kena dau vakau nai tukutuku me tukuni wavoki kina vei ira na vakayagataka na Inkk.
Ia, ena gauna e tini kina edua na kalougata, e so walega na gaunisala e vakayagataki me tukuni wavoki kina ni na mai cava tiko na kalougata oqo ena siga oqo.
Ena dua na vadidike ni Matabose, e qai laurai ni ra se kabi wavoki tikoga mai na tauni kece mai na yasayasa vaka Ra nai tukutuku tabaki ni kalougata oqo nei Inkk, dina ga ni sa lako sivia na gauna sa mai cava kina.
Ena gauna qai caka tiko kina na qiri vei ratou na Inkk me qaqai na leqa oqo, qai sega ni dua e sauma mai na talevoni.
E so talega na sitoa ni Digicel mai na yasayasa vaka Ra era vakaraitaka tiko enai tukutuku tabaki ni ra volitaka tiko na talevoni veikauyaki enai sau lailai ni $39 kei na $59.
Ia, na gauna me da lai taroga kina na talevoni ya, qai dau sega tu vei ratou qo e so nai vadi ka ra dau vakayagataka na kabani ni talevoni veikauyaki ena noda vanua, ka ra vakayagataka tiko me veivakacalai vei ira na dauvolivoli.
E veivakasalataki tiko gona na Matabose vei kemuni na dauvolivoli mo ni digidigi vinaka, ni wilika talega vakavinaka talega na veitukutuku eso era dau tabaka na kabani ni talevoni veikauyaki ena noda vanua.
E vakamamasu talega na Matabose vei ratou na Telecommunications Authority of Fiji (TAF) me ratou raica na kena tauyavutaki na Mobile Number Portability (MNP). Na MNP qo ena solia e levu na digidigi vei ira na dauvolivoli ka ni na rawa vei ira me ra kauta na nodra naba ni talevoni ki na vei kabani ni talevoni veikauyaki tale eso.
Ena qai bibi kina ike me toro cake na veiqaravi ka ni ra na saga tiko vakaukauwa na veikabani eso me ra maroroi ira era vakayagataka tiko na nodra veiqaravi.
E vakamamasu talega na Matabose vei ratou na TAF kei ratou na tabacakacaka ni Commerce Commission me ratou vakadikeva ka vakaraica vinaka na nodrai tovo ni veiqaravi na veikabani ni talevoni oqo me kua ni rawa lawakica tiko.