NA i wiliwili vakaviti era dau taurivaka na noda qase ena veikoro e liu.
Ena gauna e liu era sega ni dau vakalevulevuya na veika era cakava o ira na qase me vaka na magiti, se iyau. Veitalia mada ga se vaka sara e vei na levu ni magiti, ena vakatokai ga me magiti lailai, se ke tawa ena sova na magiti ena vakatokai ga na magiti me sova draudrau wale.
Na i yau ke mani vaka cava sara na kena cere ni sa bini tu ena vakatokai ga ni iyau lailai, ke mani vaka cava na vakaitamera ni vu ni yaqona ena vakatokai me dua ga na waka sarusaru se savutivuti.
Ni va tu gona oya na nodra dau kaukauta sobu i ra na lelevu ni ka era dau cakava e mani tubu mai kina na iwiliwili vakaviti me vaka eda kila tu.
Ni Tini na ibe e vakatokai me dua na Sasa, Tini na Tabua dua na Vulo, ni Tini na Masi dua na Doko. E sega wale ga ni iyau e wili vaqo e vaka tale ga kina na manumanu, sasalu ni waitui, i yaragi, vuaniqele kei na vuanikau. Ia e sa koto oqo e ra e so na i wiliwili vakaviti. Mo ni wiliwili sara yani.
Tini na Vuaka - Dua na rara
Kena ivakamacala: Eda kila vinaka na vuaka ni dau magiti vakaturaga, dau i coi ena veisoqo vakaturaga. Ni dau vakayacori na vei soqo vakavanua vakaturaga dau vakalevu mera qai dau mai vesu vata tu na vuaka. Qo e dua na gauna e rawa ni wiliki kina ena iwiliwili vakaviti makawa na levu ni vuaka.
Qo na rara e dau vakayacori kina na veiqaraqaravi vakavanua vakaturaga.
Ni vakayacori na vei soqo vakavanua vakaturaga dau vakalevu mera qai dau mai vesu vata tu na vuaka ena vanua e vakayacori kina na soqo. Qo e dua na gauna e rawa ni wiliki kina ena iwiliwili vakaviti makawa na levu ni vuaka.
Tini na Masi - Dua na Doko
Kena i Vakamacala: Na masi e dua na mataqali kau tei, dau samu na kulina, ni dau qaravi na cakacaka ni masi ra dau tukuna na kena dau na samusamu.
Na samu: [masi] samuta, tukia se uaca (masi) ena dutua kei na ike me malumalumu, raba, mamare.
Na dutua: [masi] isamusamu, tolo ni kau kaukaua. Na ike(masi) i samu ni masi, kau lekaleka vakadiana, ta ena kau kaukaua.
100 na masi - 1 doko Vatulele, 100 na masi 1 doko - na masi se bera ni samu. Lau 10 na masi.
Doko - vosa vaka Vatulele. Se sosoko ni se tu taucoko tu. Doko kena ibalebale e sosoko. Kevaka e saqa tiko na kesa ena tukuni mo raica mada na masi e sa doko, sa buta. Kevaka e se tu taucoko tu. Ni samu sa qai kasere, sa qai tatevu me raba sa qai yacana kina na masi.
Tini na Ibe - Dua na Sasa
Kena i vakamacala: Na sasa e tautauvata na I vivivi. Tini na ibe e rawa ni tukuni me dua na sasa se dua na i vivivi na ibe.
Sasa ni tini na ibe: E rua na sasa na nodratou itavi ibe ena tevutevu; I vivivi n vica na ibe vivi vata: Ra marau na marama nira yadua sara ga na i vivivi me nodra i votavota; i vakavivi; tini na ibe.
Tini na Mana -Dua na i Kasi
Kena i vakamacala: Ni tini na mana sa dua na i kasi mana. Na i kasi na i tui ni mana, ni vesu vata e tini na mana e vakatokai me dua na i kasi me vaka na niu dua na i qali niu.
Tini na i kau Vudi - Dua na Bewa
Kena i vakamacala: Na bewa na vata e lili kina na vudi ni solevu. Ena gauna e liu ni dau vakarau vakayacori e dua na solevu sa dau ta mai na ikau vudi mera mai oko (so beka na vanua ra dau taya mai na vudi me mai oko me dau malimali ena kana ni vakamau).
Ni oko na vudi, qo me vakadreutaki. Eso na veivanua e kelirukuti vakabalavu na kena qara, viri na kena vata qai waqa na buka e gusu ni qara. Na levu ni vudi e vakadreutaki e rauta sara ga ni dua na kena vata oya gona e qai kau mai kina na iwiliwili vakaviti qo ni tini na i kau vudi sa dua na bewa.
Oko okota vakadreutaka (vudi, jaina) ni ta mai qai olo ena draunivudi, taga. E so e kelirukuti vakabalavu na kena qara, viri na kena vata qai waqa na buka e gusu ni qara; Sa oko e dua na bewa me malimali ena kana ni vakamau.
Tini na ika - Dua na i vua, bola, mata
Kena i vakamacala: Na i vua na kau ni colacola. i vua 2 tini na ika lelevu.
Ni dau levu na ika e rawa mai ena qoli e dau vakaivuataki sara ga ena kena levu.
bola - [Lau] Ena so na vanua vaka mai Lau rau dau vakayagataka na bola lalai tali beka ena drauniniu, na noke me dau tawa kina na ika, ke ika lalai - kau gona mai kina na i wiliwili vakaviti qo ni tini na ika sa dua na bola.
mata2 -na mata e na bola. Ena so na vanua ra dau cavuta ni tini na ika sa dua na mata, ke ika lalai.
Tini na Niu -Dua na i Qali
Kena i vakamacala: E dau qalini vata ga na niu. Ni qalini vata e tini na niu rawa ni qai vakatokai me dua naiqali.
: i qali: tini na niu: Au cola mai e dua na i qali; buru 2; levu na niu madu qalini vata; rua, i yawa; qalina vc vesuka yarurua (niu) qai tuya vata ni wiriwirini vata na kedra i vesu:
Mera qalini rawa na niu ra qai usa i waqa; qaliqalini; i qali 10 na niu qalini, i qaliqalini kena i cakacaka; talivesu; buki, kasi, qali 1, sole 3, tobe
Tini na Uto - Dua na i Sole
Kena i vakamacala:
Na i sole - solea vesuka vata na kasani (uto) ena wa, me colati; Ena so na vanua cavuti tale ga kina ni sole na uto ra dau tukuna me kasini, dau cavuta kina me tini na uto sa dua na i kasi. ni sole uto vesu vata
: i sole tini na uto: E dumuki mai e dua na isole na uto; ikasi 2 (tini na uto; isole, tura 1), tura 1; sole 2; sole 2 solea vesuka vata na kasana (uto) ena wa, me colati; ni sole uto vesu vata, i solesole kena i cakacaka; kasi 1; bukisoleniuto
Tini na Moto - Dua na Tuatua
Kena vakamacala: Nida raica eso na ulunivanua eso e momoto sara na ucuna, qai kau gona mai kina na iwiliwili vakaviti qo, ni tini na moto sa dua na tuatua. Na tuatua na ulunivanua momoto.
Tini na i Wau - Dua na Bure
Kena i vakamacala: bure 2 n tini na i wau; tuatua)
E levu sara na i vakamacala ni bure, dua na bure na vale, duatale na burekalou. Ena gauna e liu dau vakalevu mera dau tu ga i bure o ira na cauravou ra sega ni vakawati. O ira na cauravou qo era dau tamata ni i valu, ra vakaitikotiko ga i bure vata kei na nodra i wau ni vakarau ga e dua na i valu ra sa dau lako mai.
Tini na Vai Dua na Tabakau
Kena i vakamacala:
Na tabakau na drauniniu tali taqavirua, vb me icoco ni valenikuro se me su ni vale.
Ena iwiliwili ya tini ra vakatauvatataka na qase ena gauna e liu na raba kei na balavu ni dua na vai e vaka sara ga na raba kei na balavu ni dua na tabakau. Ni rawa mai e tini na vai mai davo tu vaka sara ga e dua na tabakau ena kena raba kei na kena balavu.
Tini na Qari Dua na Vatu
Kena ivakamacala: Mai Nadroga kei Rakiraki e dau cavuti tale ga ni dua na vatu e tini na tabua. Eso tale ra dau cavuta ni dua na vatu tini na lairo se kuka.
Tini na Lairo Dua na iDoi
Kena i vakamacala: Na idoi na i vesu lairo, vb me tini; qo me vesu vata e tini na lairo cavuti kina me dua na idoi. Ena so na vanua e dau cavuti kina na idoi me wekai.
Tini na Kuita Dua na Dali
Kena i vakamacala: Na kuita m ika ni waitui, vaqalona, sega na varina se buina;
Ni dikevi na ivakamacala ni yavu ni iwiliwili vakaviti qo, e dua e tukuni kina vaqo ni vakaibalebale na dali ena kuita.
Na babalavu ni qalokani kuita e vaka na dali. Ni sema vata na qalokani kuita vaka sara tu ga na irairai ni dali.
Duatale na kena ivakamacala e vaqo ni rawa mai e tini na kuita e qai dau tui ena dua na dali.
Tini na Vasua Dua na Matau
Kena i vakamacala: Na vasua eda sa kila levu tu ni dua na mataqali vivili ni waitui. Duatale na mataqali vasua e levu toka, qa dravia, sega na vuna, dau veicavuyaki, nunuvi se siwati.
Ena duatale na kena ivakamacala e tukuni vaqo ni qani vasua e gagata vaka na matau. O koya gona qo e yavutaki tiko mai kina na noda i wiliwili vakaviti qo ni tini na vasua dua na matau.
Tini na Kuro Dua na Sava
Kena i vakamacala: Na kuro sa da kila levu ga ni dau saqa kina na kakana, dua na kena mataqali na kuro ni viti.
Na sava qo na mataqali kuro ni viti lelevu. Ni biuvata e tini na kuro ni viti lalai qai rawa kina e dua na sava.
Tini na Toa Dua na Soga
Kena i vakamacala: Ena dua na kena ivakamacala e tukuni vaqo ni gauna e liu ra dau vakayagataka na qase na draunisoga me delanivale. Qo e dua na mataqali vunikau vaka na vuni niu.
Dau beti yadudua na drauna, tali; ni tali oti qai biu me delanivale, sa qai dau savu tu yani na vusona me laurai tu. Ni dau liwa mai na cagi qai dau cagicagina na vusona, nida raica yani e vaka sara tu ga na vutini toa. O koya gona qo e qai yavutaki mai kina na noda iwiliwili vakaviti qo ni tini na toa dua na soga.
Tini na Tavaya Waiwai Dua na Buru
Kena i vakamacala: Ena so na vanua me vakataki Lau ra dau tukuna kina vaqo ni tini na niu dua na buru qo e tv ni dua na iqali. O koya gona qo e yavutaki mai kina na noda iwiliwili vakaviti qo ni tini na tavaya waiwai dua na buru.
Tini na Vonu Dua na Biī
Kena i vakamacala: Na biī na ba e dau keli i wai mera maroroi kina na vonu. O ira na qase e liu ra dau biubiuta ya tini na vonu ena loma ni ba.
Ni biu e tini na vonu ena dua na ba qai vakatokai me dua na bī. Ni yacova ga na tini na iwliwili ni vonu ena dua na ba, ra viria tale e dua. Ke rua na bi e rawa kena ibalebale oya ni sa ruasagavulu na vonu e rawa tiko ena rua na bi. O koya gona qo qai yavutaki mai kina na iwiliwili vakaviti qo ni tini na vonu dua na bi.
Tini na Dovu Dua na Qolo
Kena i vakamacala: Na qolo na sovuni dovu i cake, na tagona kei na drauna gonegone duadua e cake.
Ni dau tuiā mai e tini na dovu ra vesu vata, qai dau musu laivi taucoko na drauna me qai vo ga na drauna gonegone duadua sara icake.
Nida rai yani eda na raica ni vaka me dua tiko ga na dovu, ia; e tini na dovu e vesu vata tiko oya. O koya gona qo qai yavutaki mai kina na iwiliwili yatini qo ni tini na dovu dua na qolo.
Tini na Qio Dua na Laca
Kena ivakamacala: E dua na kena i vakamacala e tukuni kina vaqo nira lakovata tu mai e tini se sivia na qio, ena vaka tu na irairai ni dua na laca levu na ibulibuli ni nona ulutoa.
O koya gona qo e qai yavutaki mai kina na iwiliwili vakaviti qo ni tini na qio dua na laca.
E na qai tomani tale yani.