E GADREVA o Meli Nuku, e dua na turaga ni Vunisea e na Tikina makawa o Tokaimalo me vakadeitaka nida sega ni vu mai Taqaniika.
E vakaraitaka na turaga oqo na tikina e baleta na kena e vaka me vakadeitaki tiko nida gole mai Taqaniika na kawa i Taukei.
Na Kalou e a solia ga vei keda na vanua oqo o Viti, e kaya.
Kuria ka kaya ni donumaka mai na gauna ni koloni levu era tukuna nida gole mai Taqaniika,
A sega sara ga ni bau dua e tiko mai Nakauvadra me volavola.
E a maroroya ka taqomaka na noqu yavu o Lekaninabuya, e kaya.
E vakaraitaka o Nuku ni o iratou ga na nona vuda era a maroroi rau na Ciri o Nakausabaria kei Cirinakaumoli e na gauna rau sa cemuri kina.
Era veimaroroi o ira na neitou vuda baleta ni oya na i sulu ni vanua.
Rau a maroroi mai Burelevu e na kena tara a nodrau bure, e kaya.
E vakadeitaka o Nuku ni oqo na vanua e solia na Kalou me da tawana.
Tomana ka kaya ni gauna oqo e sa duidui sara na noda lotu kei ira a vuda e na gauna e liu
E na gauna sa rau cemuri kina na Ciri sa qai kaya o Waicalanavanua na tamadrau ni tabu na vakadave dra.
Era lotu dina ka savasava na vuda e na gauna e liu, kaya o Nuku.
Ia, e kuria ka kaya ni a cala ga vua na tamadrau na Ciri ni a sega ni tukuna vei rau ni tiko e dua na Kalou Bula.
A ta na waqa ka ra vodo kece kina me yacova ni yaco yani ki Raviravi a lave yani e dua na vatu levu me nodra i kelekele.
E a vakaraviravi kina na nodrau waqa na Ciri e Raviravi, e kaya.
E vakaraitaka o Nuku ni yaca ni nodrau waqa na Ciri na Bukawaqa ka vosa vaka Burotukula e Wainibuka.
E dua ga na Degei.
Kevaka e rua na Degei, ia, me vakamatatataki mai na nona yavu na kena i karua, e taroga na turaga ni yasana vakaturaga Ra oqo.
Kaya o koya ni nodra yaco mai na muri mai ka tukuni tiko nira gole mai Taqaniika era a muria na Tuleita.
Ia a sa kuvu makawa tiko na buka e loma ni vanua. Sa ra mani golevakadodonu sara vaka ki Verata.
Mai Verata era se mani se kina na luvei Lutunasobasoba, kaya o Nuku.
Na i lakolako ni tawa vanua oqori e a vakavuna me dua na i wase era savu sobu yani vaka ki Naitasiri, me vaka e kaya o koya.
Kaya o Nuku ni gauna e rau sa vakavuna na i valu mai Nakauvadra e sa qai tukuni vei rau ni rau sa vakamate tamata, ka rau sa vakaseva na kawa nei Viti nimataka.
Oti e vitu na i taba tamata e na yaco mai na yavavala. Ni oti na yavavala e na qai yaco na gauna nei Viti.
Kaya o Nuku na gauna nei Viti sa i koya e donumaki ira oqo:-
1) Navosavakadua se o Mosese Dukumoi
2) Apolosi R. Nawai (Viti Kabani)
3) Ratu Sukuna - turaga vuku
4) Ratu Sir Kamisese Mara - Sol ini qaqa
5) Timoci Bavadra - me cadra na veiliutaki nei Viti mai na Yasayasa Vakara
6) Gauna oqo kena mai yaco na yavavala
7) Na veiliutaki e na gauna vinaka nei Viti ka se bera mai
E vakaraitaka o Nuku ni sa dodonu me sa talaucaka na veika oqo baleta ni kila ni dodonu me ra kila o ira era lecaika tiko e na keda i tukutuku.
Na i tukutuku oqo keimami dau maroroya, ia, au rere niu sa raica na i sele kei na ose o koya kau sa vinakata kina meu talaucaka yani me matata.
E vakadeitaka o koya ni vale ni bose mai Bua e tiko ga e Nakauvadra me vaka e dau tukuni tiko e na Lawata ni gauna se na vucu makawa.