LEWE levu era kila na i balebale ni yacana Kubuna ka ra dusimaka ni oqori e dua na Matanitu Vanua. Ia, mai na kena i tekitekivu se o cei e tauyavutaka, e sega ni levu soti sara na lewenivanua kawa i Taukei era kila vakavinaka.
E na dua na vakasokumuni i tukutuku ni vanua e vakayacora na tabana ka qarava tiko na i tukutuku makawa, e virikotori kina e dua na i tukutuku nei Ratu Isoa Natuiituba mai Bau me baleta na Yavusa Kubuna. E vaka koto oqo ne na veika e a cauraka e na nona soli i tukutuku kina.
E tolu na i tukutuku ni uma tamata ka yacana tiko edaidai na Yavusa ko Kubuna. E tukuni tolutolu ni sega ni macala vinaka kevaka e tukuni wale ga e dua.
Na Ulumatua
E a tauyavutaki Kubuna taumada ko Vueti, a watina ko Raluvenibatiki, vata kei ira na nodrau i lawalawa. Ko Vueti oqo e luvei Paula, na Ratu mai Moturiki, ka tinana ko Bunonitokalau, na luvei Roko Mautu mai Verata. Ia, ko Paula na luvei Buisavulu se Buiniseniivi, na ulumatua (yalewa) kei Lutunasobasoba.
Matai ni Tukutuku
Sa dei na i tikotiko mai Kubuna, e a qai yaco na i valu levu mai Nakauvadra ka kainaki ni a taya kina na waka ni vugayali ko Vueti, ka qai vure mai kina na wai ka qai luvu kina na nodra koro ni valu ka nodrau ko Nacirikaumoli kei Nakausabaria, vata kei ira na Mataisau.
E lagilagi ko Vueti e na ka e cakava ko ya, ka ra mani vakaliuci koya kina na veimataturaga ka lako e na i valu oqo. Sa ra mani wase kina na tamata mera vakarorogo vua, me macala tani mai Verata, Rewa kei na veivanua tale e so. Ia, e so vei ira na laki vala oqo era a vakasavi mai nira dau kanaka yarua tiko, ka ni so vei ira na laki vala oqo era a mani gole sara yani vaka ki Navosa, so vaka ki Matailobau, so ki Wainibuka, so ki Viria ka vakatalega kina ki na veivanua tale e so.
Ni sa oti na i valu oqo e sa qai biuti ira mai na nona ko Vueti mera lesu tale mai ki Kubuna. Ni bera na nodra lesu mai oqo era sa buli Vueti oti kina me i Liuliu ni Valu mai Nakauvadra, ka yacana buli kina o Roko Tui Bau.
Sa i ira oqo na muri koya voli mai:- (1) Sauturaga se Sausauvou (2) Tui Kaba (3) Vusaradave (4) Matanivanua
Yavusa Ratu
E nodra i liuliu tiko mai na Sauturaga ko Rasari e na Yavusa Ratu: ko ira na Tuikaba ko Lewanavanua; ko ira na Vusadrave ko Rabalabala; ko ira na Matanivanua ko Lekaliu.
Nira sa yaco mai ki na gusu ni wai ko Drauinaleka, na Wainibuka sa mai yala e kea ka gole yani ki lomai Nakorotubu.
Era a lewa vata me sa so e toka yani, ka me ra yavoca mai na veimataqali mera sa vakatawa vanua ko ya, ka ra sa butuka oti mai. Sa mani nodra i liuliu na vakatawa ko Bulibulivanua, e dua vei iratou na Sauturaga.
Na nodra kawa na lesi oqo mera vakatawa na vanua era sa butuka oti mai, sa i ira na lewe i Nakorotubu tiko edaidai, ko ira ka ra dau cavuti tu mera Gonesau, me baleta na nodra veikacivi nira sa veitalatala.
Ia, nira sa takali mai ko ya ko ira na lako vata mai kei Vueti, ka qai laurai ni ratou sa toka kece yani vei ira na vakatawa mai Nakorotubu ko iratou na Navusaradave.
Mai kea era sa qai baci mai toka vakadede tale e na dua na vanua e na bati ni Wainibuka ka ra vaka toka me yacana ko Nayavu, ka yaca ni kena matasawa o Kubuna. Sa ra baci lewa tale me vakatawai na vanua ko ya, sa mani wase kina e so vei ira na Sauturaga, ka so mai na Tui Kaba me nodra i tavi na qarauna na i tikotiko mai Nayavu.
A nodra i liuliu ko Lewanavanua.
E na nodra mai toka ko ya ni sa bera na nodra veitalatala, e sa ono na nodra koro ko Nayavu, Nakorovatu, Drekeniwai, Naseuvou, Mataiba kei Uluibau. Ko Vueti e a vakoro mai Nayavu, ko Lewanavanua mai Nakorovatu.
Ni ra sa vakatawa kece tiko na veikoro oqo, sa ra qai yaco mai na Qalivakabau ena nodra lako sobu mai Nakauvadra.
Era mani vakatikori mai Nasau voleka ki Naveicovatu. Dede vakalailai e ratou sa qai yaco tale ga mai ko iratou na nodra turaga na Vusaradave vata kei iratou na Rokowiri ni ratou sa biuti Nakorotubu tale mai, ia, ko ira ga na lewe ni nodratou mataqali era sa mani biu tu yani ka sa i ira ka a vakatawai Saivou tu edaidai.
E a mani lewa ko Vueti me ratou liu sobu mai. E ratou a mai toka mada mai Naitasiri, mai kea ratou qai mai vodo mai Drekeinakelo.
Ni namaka na kena i kuri ka tarava.