Update: 1:59PM NA kena mai tawani na koro o Naqelewai e vakaraitaka o Manoa Vakatawabai mai na tokatoka Lau e na yavusa o Nabobuco e nona ika na duna ka nona manumanu na beka ka nona kau na bobo (lavo) bitu (tako).
E vakaraitaka o Vakatawabai ni rau veitacini o Ratu Waicalanavanua kei Rokotuicolo. O Rokotuicolo e watina na marama ni Mali.
E a vakasavi mai Mali, e kaya o Vakatawabai.
Na solisoli ni qase e taura tu vakaukauwa o Ratu Waicalanavanua ka dodonu me nona na i solisoli ni lotu, e kaya.
E ra mani bose na Vu se o cei e rawa ni kauta tani mai na solisoli vei Ratu Waicalanavanua.
E vakaraitaka o Vakatawabai ni o koya e kena kawa ni kena vakaburetaki na ca me kovei na i solisoli vei Ratu Waicalanavanua.
Na kena vakaburetaki na veika e caka me rawa ni kovei kina na solisoli mai vei Ratu Waicalanavanau e a mani yaca kina ni noqu mataqali o Bureca me kena i vakadinadina tiko ni veika e a caka e na gauna oya, e kaya o Vakatawabai.
E kaya o Vakatawabai e na gauna e ra sa rawata kina na nona qase na veika me baleti na kena kovei na solisoli qo mai vei Ratu Waicala e a qai vakayagataki kina na vosa vaka- Ra ka vaka oqo na veika e ra kaya na qase ena gauna oya, Sa Lau na Mogana
Mai ke ya saraga e a tekivu mai kina na noqu Tokatoka o Lau mei vakadinadina ni veika e caka e na gauna oya ka mani yaco vaka kina, e kaya.
Na kena rawati na solisoli oya sa vakavuna kina me ra lotu na veiyavusa ka ra sa biubiu talega mai na yavutu me ra takoso mai e na loma ni vanua ka ra mai cegu e Nailuva. E na nodra tiko mai Nailuva e ra vakayavu mai kina ka yaca ni yavu mai kea o Durukuna.
Na yavu nodra na neitou qase mai Nailuva e yacana o Durukuna, e kaya o Vakatawabai.
Na kena toso tiko mai na i lakolako qo e colati tiko mai na kena i wau ka nona i tavi tiko mai kina o Nabuasoro ka colati tale tikoga mai na kato.
E na nodra sa cabe mai Roma e ra mai cegu vakalekaleka ka mani tara talega e kea na bure mai kea talega e qai vakayacori kina na vakawirimadigi ka tukuni kina ke mani lako mai o Ratu Waicalanavanua me mai kauta lesu na kato ka sa vakayacani e na vanua oya ko Bureniwau.
Mai kea e vakayacori kina na vakawirimadigi me baleta na nodra kilakasamataka na qase de na muri ira mai o Ratu Waicalanavanau me mai kauta lesu na kato, e kaya o Vakatawabai.
Ratou sa mani tukuna na neitou qase me sa kau sara na i wau ka me keitou vakatawana, mai kea e tiko na kena vakadinadina ni bula tiko na yaca vei keitou oya na Vakatawakoro kei na Vakatawabai, e kaya o Vakatawabai.
Oti e ra biubiu mai na sa mai tiko e na gauna qo mai Nasiriti ka biubiu mai Mataso ka ratou mai maroroya tiko na i wau na tiko mai Rewasau me yacova mai na gauna qo.
E dua na qaqa ni meke e tukuni kina vaka oqo ne.
NA YAVUSA O VATUKALOKO
YALAYALA O NABOBUCO, O NASOQO
VEITALIA SARA SE RA BULI SE RA ROKO
RA TAMATA GA NI VAKAROROGO.
Na veivakadinadina kece ni veika au talanoataka tiko yani e se tiko vei keitou e na gauna qo oya na i wau e se lili tiko mai cake vei ratou mai Rewasau, na vakawirimadigi au se vakayagataka tiko me yacova mai na gauna qo, kei na veiyaca e tukunikataka na veika sa yaco oti me vaka na yacaqu o Vakatawabai kei na Vakatawakoro e i vakadiandina levu ni veika au sa cauraka oti yani, e kaya o Vakatawabai.