A veisoqo kece vakavanua e duidui na kena cabori se vakayagataki kina na yaqona.
E levu na lawa e vauca me vaka na yawa ni gunu yaqona vakavanua kei na lawa ni gunu yaqona ni veibuli turaga e duidui kece na veika e dau vakayacori.
Ia, me da raica mada na gauna ni veibuli turaga.
Na cava e dau vakayacori e na gauna e dau buli kina e dua na turaga kei ira na dodonu me ra na vakaitavi.
Ni wiliwili sara yani. Era sa na tikoga ena veibuli oqo o ira ga na turaga ena vanua sa ia kina na veibuli, kei ira na Komai, era sa vakai tutu ena vanua.
Era sa turaga qase eso, ka nanuma eso mera sa gunu vata vakaturaga ena yaqona ni veibuli.
Sa nodrai tavi na mataqali Sauturaga na caka yaqona ni veibuli, ka nonai tavi e dua na gone turaga ena mataqali ni turaga sa buli me tu yaqona.
Ai tui ni tanoa ni yaqona ni veibuli, me dodo yani me donuya na turaga sa tiko me buli. Me tukuna yani vei ira na turaga era soqo tiko ena veibuli.
O koya ka lose yaqona ka vaka, Sa oti saka tu na yaqona.
Ena qai sauma mai o Matanivanua sa tiko vata kei na turaga ka vaka, Lose sa na lewa talega o koya na kena wai ni yaqona me wai donu.
Ni sa lose tiko na yaqona, sa na qai laga tiko na kena meke ni yaqona ni Sau. Era sa meke na vanua era coko tiko. E so na vanua e Viti e na gauna qo esa tekivu me yali yani na i vakarau ni kena vakayacori e dua na soqo vakavanua e na kena vakayagataki na yaqona.
Na kena sega talega ni vakayagataki na meke ni yaqona.
Ia, e dodonu me da na kidava tiko na veika e sa na kauta mai o gauna ka na rawa ni vakayalia vakadua na veika dina me baleti keda na i taukei.
Sa koto oqo e ra e dua na meke ni yaqona ka nodratou na yavusa Navunitivi mai na koro o Matainasau. Na meke ni yaqona qo e vakaraitaka ni dau vakarau me gole ki valu na nodratou qaqa ni valu e yacana ko Tikonabua e dau qai caka na mena yaqona ka meketaki talega.
E vaka koto oqo na qaqana.
1. Manumanu cava ka vura
Manumanu vuka e vuravura
Ra vuka muria na wainibuka
Ra masia tu na masi vulavula
Ra tinia era era ruarua
2. Yadrata manumanu cava u yadrata
Manumanu vuka i macawa
Ra vuka muria na Wainimala
Ra masia tu na masi tavatava
Ra tinia era era yarayara
3. Kura ravi tu na vuni niukula
Vavalagi na waqa vanua
Ra sokota na wasa mai Rotuma
Se vuka tubu i lagi na ruve vula
Ra masia tu na masi vulavula
4. O i e na kula marawa
E dosi bale na kula ni Moala
Vuki tale moce tadratadra
Uru e sobo e uru e laca
Uru ta na karikari ni waqa
O i e so i sawana
O i e so i sawana
5. Ma i vuni vono na wai e tiki rorogo
E yavu na koro cagi era vadugu koto
Na qele vuki e tale va ono
Lewe i Beqa e ra ucu koto
Salusalu ma tava ru domo
Nodra salusalu ni kaba koro
Vodi a uma vodi a moto
Au saka au Kalou ni Colo
Au kaka me tavu na koro
Sa tavu kece na ulu ni colo
Oi e na siga drodro