Update: 1:27PM E DUA na tutuna vou eratou sa mai tekivutaka ena macawa oqo na i Soqosoqo ni Marama ni Katolika ena noda vanua, me vaka e dau bulagoci keda tiko mai kina e dua vei ira na duru ni soqosoqo o Susana Evening.
E levu sara tiko na porokaramu eratou qarava tiko na i soqosoqo oqo, ka yaga raraba ena nodra vakatoroicaketaki na marama kei na qaravi raraba ni vei tikotiko era vakaitavitaki ira kina.
Me vaka e da kila vinaka, ni levu vei keda na marama e Viti kei na Pasifika, eda sa kila na yaga ni vuli, ka dua na sala era veivuke tiko kina na marama lewe ni soqosoqo ni na Catholic Womens League, oya na nodra vukei na marama tina ni gone vuli ena koronivuli ni veivakarautaki na Corpus Christi Teachers Training College.
Era dau vukei na marama ena nodra cakacaka ni liga, me vaka na ibe, na basikete, na i sulu era dau cula kei na cakacaka ni liga tale eso e dau kau mai ka volitaki ena teveli ni Womens centre e Suva.
E qarava tiko na stall oqo o Teresia Tauleka, e dua na lewe ni Catholic womens League ena tabana ni Parisi ni Tubui Imakulata e Lami.
E levu tale na vuli yaga eratou dau lewena tu na lewe ni soqosoqo ena kena vakatoroicaketaki tikoga na noda kila-ka.
Mai Nausori e sa dau caka tikoga na porokaramu ni kena vakayagataki na yaya eso era sa sega ni yaga me rawa ni vurevure ni i lavo. Oqo me vaka na palasitika, na pepa kei na veika tale eso eda sa dau sega ni via vakayagataka ena noda veivuvale.
Esa mai yaco talega na veidigitaki ena loma ni soqosoqo me cici ena loma ni tolu na yabaki.
Oqo mai na yabaki oqo 2012 kina yabaki 2014.
Esa tokitaki ena yasayasa vaka- Ra na veiliutaki, ka sa Peresitedi tiko o Sulita Tuiqali, na Vunivola o Temalesi Kwong, ka Dauniyau o Koncepta Ravouvou.
E dua talega na i tuvatuva vou esa koto, oya na kena sa cakacaka kei na Ministry of Environment kei na soqosoqo ni marama Katolika oya na kena vakatetei na kilaka me baleta na maroroi ni benu ena veivuvale kei na i tikotiko.