ENA vagolei vakatabakidua tiko na soli ni Siga Tabu oqo (22 ni Evereli) ena veivalenilotu ni Wesele kece e Viti, ki na kumuni i lavo kina nodra vakacokotaki na wekada era vakaleqai ena ualuvu ena tekivu ni vula oqo.
E vakaraitaka na Vunivola Levu ni Lotu Wesele, o Talatala Tevita Nawadra ni oqo e kerea tiko na veiliutaki mai na valenivolavola liu ni Lotu Wesele, ka na namaki mena veisoliyaki yani na veivuke oqo vei ira na wekada ena mua ni vula oqo.
Eda na soli raraba kece na lewenilotu e Viti, ia era na vakuwai ga o ira na wekada era vakaleqai mai na Mua-i- Ra, e kaya.
Vakabibitaka ni veika ga eda sa rawa ni solia, e sa na ciqoma na lotu, e ciqoma talega na veivuke ni i sulu se na kakana se na i yaya ni vale cava e rawa ni da solia ena nodra vukei na veivuvale, e sa na ciqoma talega na Lotu Wesele.
Eratou sa cakacaka veivolekati tiko kei na i Liuliu ni DISMAC o Pajiliai Dobui kei na dua na komiti esa tauyavu tiko mai na Yasayasa vaka- Ra ena vuku ni veika e sasagataki tiko oqo.
Vakadeitaka o Nawadra ni na vukei kece o ira na wekada mai na Mua-i- Ra ka na veivuke raraba.
Ena vagolei raraba na veivuke, ka sega ni na vukei ga o ira na lewenilotu.
E na tarai ira saraga na noda era vakaleqai dina ka ra sega tale ni kila se ra na vakacokotaka tale vakacava na nodra bula ni vuvale ni mai oti na ualuvu ena macawa ni Curu vaka- Tui nei Jisu e Jeruisalemi, e kaya o Talatala Nawadra.
Ena macawa sa oti, eratou sa kauta talega mai na nodratou veivuke kina valenivolavola na Wasewase o Nabua, ena kena kau mai na kakana, na i sulu kei na i lavo.
Tukuna ni sa gole sobu na nodratou i vakailesilesi o Patiliai Leqa ena kena laki vakasokumuni mai na i tukutuku kei na vakacaca e tara na veivale vakaitalatala kei ira na vakaitavi ena cakacaka ni Turaga kei ira na lewenilotu.
Kei na veivuke cava tale e raica ni kila ni na rawa ni na veivuke kina na Lotu Wesele, e kaya.
E kuria ni sa soli tale tu ga na galala vei ira na lewenilotu kevaka era sa veivuke tiko ena kena vukei na wekada ena veisoqosoqo cava tale era curuma, se na nodra via soli i lavo ena kumuni i lavo ena nona akaude na Paraiminisita, e kaya o Nawadra.
Mai valagi, era sa solia tiko mai na nodra veivuke ka ra veitaratara tiko mai na lewe ni lotu mai Ositerelia, Mereke kei ira na noda era lewena tu na mataivalu ni Bolatagane mai Jamani kei Igiladi.
Era sa taroga tiko mai na akaude ni lotu me ra vakauta mai kina na nodra veivuke, e kaya.
E vakadeitaka talega o Nawadra ni sega ni dau kacivaka tu se tukuna na lotu na veivuke cava e dau cakava, ka na qai vakadewataki ga na i tukutuku kevaka e dau yaco yani ki valenilovolavola e dua na vakatataro.
Ia, na gauna ga keitou sa raica kina ni sa na vakau na i yaya kei na veivuke, ena qai yaco kece oqori.
Ni sa rawa kece mai vakavinaka na kena vakasokomuni na i tukutuku taucoko e na veika e sa kumuni rawa mai vei ira era dodoliga kina kaci raraba ni veivuke oqo, e kaya o Talatala Nawadra.