E VAKARAITAKA o Koro Qaunidruka yabaki 64 mai na koro o Nasukamai e na tikina o Nalawa e na loma ni yasa o Ra na i kuri ni serekali nei Navosa.
E vakavinavinaka o Qaunidruka vei ratou na wekana mai Naqelewai e na nodratou laveta cake tale mai na veika me baleti Navosa kei na tukutuku e se bula vinaka tu me baleti koya. Au vakavinavinaka vakalevu vei ratou na wekaqu mai Naqelewai ena nodratou vakaraitaka mai na i talanoa me baleti Navosa ka vaka kina na kena serekali me yacova na nona sa laki mate mai Rotuma, e kaya o Qaunidruka.
O Qaunidruka e nona manumanu na vuaka, nona kau na Wa me ka cavutu mai na mataqali o Tabuqau e na yavusa o Naiova. E sa koto oqo e ra na i kuri ni serekali ka ratou tekivuna na turaga ni Nabobuco. Ia na kena i toma e volai koto qo e a vakaraitaka o Qaunidruka. Ni wiliwili sara yani.
NOQU MATE VAKADUA MAI ROTUMA
BOGI TOLU AU TUCAKE TALE, AU VODO CAKE NA WAQAVUKA
AU RO SARA MAI NUKUNITABUA
RAU SA TARO MAI NA CIRI -VAKACAVA
SAUMA O NAVOSAVAKADUA AU SA MATE E NA NOMUDRAU LEWA
VOSA CAKE MAI O KOYA E QASE
TOU MAI GADI MADA I JAMANI
ME TEKIVU NAI VALU REREVAKI
ME SAUMI KINA NOMU TAGI
BUCA NI VALU AU SARASARA
ERA LAUSUA ERA LAUVANA
TUTURU TU NA WAINIMATA
VALENIBULA AU BIUTA, AU KOSI KINA SAUCA
AU BUTUKI JAMANI I NA RUA
TIKO KINA O NAVOSAVAKADUA
HITLER NA KENA I KARUA
NA VU KEI VITI
VALE TABA RUA ERA BIUTA, TAVAYA WHISKEY ERA TAURA
NODRA SEVUSEVU NA VU NI VANUA
I VUNIGASAU NI SA BULA
VAKACAVA NA GAUNA KEI VITI
SAUMA O NAVOSAVAKADUA, NI WAWA VAKAMALUA
MEU VEISAUTAKA MADA NA GAUNA
ME SAUMI MADA NOQU MATE VAKADUA MAI ROTUMA
E kuria ka kaya o Qaunidruka ni yaca na Hitler e vosa vakara ka kena i balebale na kitala.