E SA laki dolava ena macawa sa oti na Paraiminisita na volau ni kena dau vakau na tikitiki ni kau mai Wairiki e Bua.
E rauta ni 100 na lewenivanua mai keya era sa na vakacakacakataki ena veivakatoroicaketaki oqo.
Tukuna kina o Komadoa Voreqe Bainimarama ni dua na i tukutuku vinaka oqo e Vanua Levu, ena kena sa na tosoya cake na i vakatagedegede ni rawa i lavo kei na bula raraba ena vanua oqo.
Na tikitiki ni kau oqo e na vakau sara tiko e Japani, na kena makete e sa veivosakitaki oti tu.
Me vaka ni veivuni paini lelevu mai Bua, na veivakatoroicaketaki oqo, ena dolava e levu na veivakatorocaketaki lelevu tale, e tukuna o Bainimarama.
E sa tei oti talega e rauta ni 5700 na eketea na paini, na tabana ni Fiji Pine ena kena sagai me kua ni leqa ka vakadeitaki tiko na bisinisi oqo.
Tukuna mai o George Vuki, e dua vei ratou na manidia levu ni kabani oqo ni teivaki ni paini oqo ena vakayacori ena wasewase na Vualiku kei na Mua-i- Ra ni noda vanua.
Vakadeitaka o Vuki ni sa tekivutaki rawa na cakacaka levu oqo ni tei paini mai vei ira na sotia kei ira na noda era tiko vakavesu e valeniveivesu.
Era sa teivaka oti e rauta ni 200 na eketea na veipaini ena nodratou tabana na Fiji Pine mai Lololo, Drasa e Lautoka.
Tukuna o Vuki ni ratou a kerea veivuke kina valenivolavola ni Paraiminisita, ka ra qai lesi ena teivaki ni paini e rauta ni 40 na kaivesu kei 100 na sotia.
Tukuna o Vuki ni dodonu me rua na vula na nodra teivaka na 200 na eketea oqo, ia e qai tauri ira ga e loma ni dua na vula na cakacaka levu oqo.
Ena Vualiku, ena tekivu na teivaki tale ni paini e Bua kei Macuata- oqo era na teivaka e 2200 na paini, ka na vakatabakidua tikoga na tei paini ena loma ni yasana o Bua.Na i varo ni kau oqo e Wairiki ena varota na paini era vakau mai na i teitei e Bua, kei ira mai Macuata era vakauta na nodra paini me na laki varo ena Fiji Forests Industries Limited. Na kena oqo e tiko e Labasa, ka na veiqaravi vei ira na tei paini e na yasana o Macuata.
E rauta ni $26 na milioni e vakayagataka na kabani na Tropik Wood Fiji Limited ena loma ni ono na yabaki me mai vakavotukanataki kina na i varo ni kau oqo mai Wairiki.
E mai sotava e vica na dredre na kabani ena nodra sega ni kila vinaka eso na cakacaka ena kena qaravi ka tara na i varo ni kau oqo, ka mua vaka ki wasawasa, oya me sa vakavodo saraga ena loma ni waqa ni bera ni biubiu me gole ki valagi.
E dodonu me a sa mai vakacavari na cakacaka oqo ena Okosita ni yabaki sa oti, vakavuna na kena mai vakayagataki tale e vica vata tale na ilavo ena kena sagai me vakaoti e dua na vurevure ni cakacaka kei na ilavo kina noda vanua. E rauta ni $30 kina $35 na milioni ena rawata mai na veivakatoroicaketaki oqo ena noda vanua.