E levu vei keda na i taukei, eda dau sega ni kidava rawa na benu ni veivakatoroicaketaki, ka da sa vakabibitaka ga na i lavo, tukuna o Talatala Ili Vunisuwai na Vunivola ni tabana ni Veivakalotutaki ena Lotu Wesele.
Ena nodratou qarava tiko na cakacaka ni veivakasavasavataki kei na veivakalotutaki mai Kadavu ena gauna oqo, e laurai na revurevu ni veivakatoroicaketaki ena bula ni veiwekani kei na veika e sa mai tawase tu ena noda bula vakaitaukei.
Na revurevu e sa kunei raraba ena veivanua keitou dau laki caka veivakasavasavataki kina, e laurai na kasere ni bula vakaitikotiko, na kena vakayagataki na waigaga ni veivakamatenitaki, na bukete dole, na vuli dole, na tatawasewase ni bula vakaveiwatini, na nodra laki bukete taki na gone ena taudaku ni bula vakawati kei na tauvimate ni vakasama.
Oqori na veika e kauta vata mai na veivakatoroicaketaki, kei na i lavo, ka dodonu me da na kila ka wanonova matua tiko ena veigauna kece eda sureta mai na veivakatoroicaketaki, e kaya o Vunisuwai.
Me da na qaqarauni tiko, na veika ena kauta mai na i lavo, ko sa na volia kina e levu na ka e kauta mai na valavala ca kei na veika rerevaki eso ko sa na sureta mai kina nomu bula.
E sa na kauta mai na kocokoco, e kaya o Vunisuwai.
Tukuna ni tini vakacaca na kisi ni veilesuvi ni veivuvale era sa laurai oti e Kadavu, oya ena nodra sa veibiu tu na veiwatini.
Na kasere ni bula ni vuvale, e vu ga mai ena kena sega ni ra dina ena veidinadinati, kei na nodra sega ga ni qarava vinaka na nodra i tavi ena loma ni vuvale o rau ruarua o tina kei tama.
E laurai talega ni sa levu na ilavo, e sa na solia na viavia levu ka rawa ni biuta kina o tagane na watina ka laki taura tale e dua na yalewa.
E laki vakamavoataka na bula ni veiwekani, kei na veicacati.
E dua talega na ka e sa laurai na tatawasewase ni bula vakaveitacini, ka dodonu mena vakavinakataki tiko na tikina oqo.
E vakadeitaka o Talatala Vunisuwai ni sega ni i tavi rawarawa na kena qaravi tiko o ira na lewenivanua era sega ni vakadeitaki ira vakavinaka ena vuku ni veisau e sa tarai keda mai, kei na noda maroroya tiko na savasava ni Kalou kina noda bula.
E vakaloloma na nodra bula na i tabagone ena nodra sa sarava tu e vuqa na i tovo ni bula ni vuvale kavoro ena noda veitikotiko ena gauna oqo, ka dodonu me da sa kidava tiko se vei na vanua eda sa gole tiko kina, e kaya o Talatala Vunisuwai.