ERA se vakila tikoga na vaaitikotiko e Navavai, Nayawa, Drekeniwai, Vunibaqa kei Nanuku na leqa ni kawakawa e Waibasaga e na loma ni Tikina Makawa o Tokaimalo.
E kaya o Savenaca Qio, yabaki 60 ka lewe ni koro o Raviravi nira dau vakaleqa vakalevu na veitikotiko e lima ka sa cavuti koto oqori ni dau dredre na nodra takosova e na lori na i kawakawa oqori e na kena sa kau tani e dua na i wase ni qele ka dabe toka kina na wavu mai na taubi ni uca.
Mai Burotu ki Waibasaga e rauta tiko ni 22 na kilomita na kena yawa, e kaya o Qio.
Dau vakavuqa mera dau laki volivolitaki ki Rakiraki na lewe ni tikotiko era tiko e na tai ni i kawakawa ka dua.
Kaya o Qio ni a sa mai raica na turaga na Paraiminisita ena 2009 na i kawakawa oqori e na nona veisiko voli e na loma ni yasana vakaturaga o Ra.
Na gaunisala oqo e vaka e cici wavokita na daku i Narauyaba, na nona koro na mataisau kei na kena veiulunivanua e Nakauvadra ka laki basika tale vaka ki Naseyani ka siro sobu tale vaka ki Nananu me muria tale na gaunisala ka gole vaka ki na Fiji Water ka veisemati kei na gaunisala levu e yasai Yaqara.
Dau rawarawa vei ira na lewe ni veitikotiko e cake e kea mera muri ga yani vaka ki yasana kadua mera laki volivoli ki Tavua mai na siro sobu tale mai ki Burotu ka dewa vaka tale ki Rakiraki.
Sa rui balavu tale vei ira, e kaya o Qio.
Dau nodra i vurevure ni rawa i lavo na vakaitikotiko e cake e kea na yaqona, kakana dina kei na kakana draudrau.
Ia, vei ira na veitikotiko e kea o Nayawa e tiko kina e rauta ni votu na vale, Drekeniwai e tolu na vale, Vunibaqa e tolu na vale kei Nanuku e sa oka tiko me i tikotiko (sega ni tauri rawa na levu ni vale).
Ia, e na vuku ni veivakacokotaki ni matanitu me baleta na ualuvu e vakabauti ni na sikovi na veivanua e na loma ni vanua ni Tikina makawa o Tokaimalo e na vuku ni vakacaca ni wai.