Eda sa donumaka oqo na i ka 20 ni senituri ka sa balavu tiko mai na i tosotoso.
E sa levu na veimataqali veiliutaki eda sa donumaka mai, kei na veivakatoroicaketaki era kauta vata mai.
E da sa raica talega na revurevu ni veika oqori ena noda veidelaniyavu, ni da gade lesu ki nakoro.
Na veisau levu eda raica na i rairai ni veivale, na veika e sa tu ena noda loma ni vale.
Na talevoni veikauyaki, na i yaya vakalivaliva eso e sa mai tiki tu ni noda bula na i Taukei.
Esa veisau talega na veika eda kania mai na kena era dau vakayagataka na noda qase,
Eso esa veicurumaki toka na kakana, na kena e vaka- Idia, vaka- Jaina kei na kena eda kilai tani ga kina.
Na veika kece oqori e kauta mai na veivakatoroicaketaki, ka tiko talega eso na i tovo vou ni bula e kauta vata mai e dodonu meda na qarauna sara.
Me vaka e cauraka tiko ena tabana e lima o Talatala Ili Vunisuwai, na benu ni veivakatoroicaketaki.
E dina ni vinaka na i lavo, ia me vakayagataki ga ena kena i vakayagataki e dodonu.
E levu vei keda na i taukei ena gauna oqo esa lomana vakalevu na i lavo ka sa mamada vua na nona veiwekani.
Tukuna o Talatala Vunisuwai ni revurevu ni veivakatoroicaketaki e sa kune tu ena levu na noda veitikotiko e wili kina na kavoro ni vuvale.
Eso na yalewa se na tagane ena loma ni vuvale, e sa kila ni sa rawata e levu na i lavo esa solia sara vua na yalo doudou me laki lasama tale na lasa vakavuravura, yaco kina na kasere ni bula ni vuvale.
Vei ira na luveda ni soli vakalevu vei ira na i lavo , era laki volia kina na veika cala, vakavuna me ra laki leqa talega kina.
Eso era volia ki na waigaga ni veivakamatenitaki, ka so e laki tauvi ira sara na mate ni vakasama. Esa veisosomitaki ena mei gone kei na i vakasala na retio yaloyalo, na i vakatagi ena walesi kei na pepa.
E dodonu me da sa na kida mai na kawa i taukei ena gauna oqo, me da qarauna na katuba cava eda dolava tiko.
Me da qarauna ga me da kakua ni dau dolava na katuba e sega ni rawa ni sogo vakarawarawa. Me da qarauna tiko na noda bula ni maroroi ni noda veiwekani.
Me da veisemati vinaka tiko vakavuvale, vakaitokatoka, vakamataqali, yavusa kei na koro.
Ena sega ni taladrodro tiko ka marau na lewenivuvale, ni tiko na mavoa ka sa vakasausataki na veivakalougatataki e solia tu mai vei keda na Kalou.
Me da na taura matua na veitovo talei era dau bulataka mai na noda qase. Me da dau veirokorokovi ka veimaroroi tiko.
Meda qarava vakavinaka na noda vuvale ka meda dau dina ena veika kece eda qarava. Na revurevu kece ni veivakatoroicaketaki ena sega ni na laki leqa kina na veika eda bulia, ena vakila tikoga na bula ni tamata yadua.