E RIKOU na yagona, ka sega ni vakabauta o Sepeti Matararaba ni nona gole vakacakacaka ka laki sotava na cakacaka ni vakacuru ena dua na burekalou mai na koro o Vunaqoru e Nadroga. Tukuna o Matararaba ni oqori talega na gauna e sa qai vakadinadinataka ni levu vei keda na i taukei, ena gauna oya, ena 1980 vakacaca era se vakabauta tu ga na cakacaka ni vakacuru.
E levu vei keda na i Taukei, eda sega ni taura matua sara na lotu va- Karisito, me da qarava na Kalou bula o Jiova me noda i Vakabula ka da vakabauta ni o koya ga na Kalou ka sega ni dua tale. Eso tale era se taleitaka tikoga na qarava na Kalou- vu me yacova mai nikua.
Keitou a laki cakava na i talanoa ni nodratou koro makawa kei na bure-kalou, ia keitou sega ni kila ni sa caka sara tikoga na cakacaka ni vakacuru.
E lose yaqona tu o ira na vakacuru oqo, e dabe tu mai cake o koya na Bete. E ratou via lewe va toka na turaga eratou qarava tiko na cakacaka oqo. Era sa qai vatonaka tiko na yaqona esa lose oti tiko oya, e kaya.
E dua na ka na noqu rere, kei na noqu taqaya.
Ia, oya na veika eda dau sotava ni da qarava tu na noda cakacaka duidui esa lesi vei keda. E dua tale na vanua e gole kina o Matararaba oya mai Dawasamu. Ena vale nei dua na turaga au gole kina e dau maroroya tiko o koya na i moto.
E kaya o koya ni oqo e nodratou i moto ni kawa, ka ra dau qarava tu mai o ira na nona qase ena gauna e liu.
Ena gauna e kama kina na nona vale na turaga oqo, e kidacala ni qai vukataki koya ga vakai koya e tuba na i moto oqo, ka qai laki tau sara ena veikarasi e tautuba.
E a gole tu ena i teitei na turaga oqo, ka qai cici yani o ira na cauravou mera laki tukuna vua ni sa kama na nona vale. O koya na turaga oqo na nona yaco ga mai, e vaqara ga o koya na i moto ka sega ni leqataka tale e dua na ka.
Keitou kidacala ni sa qai laki kunea mai veico.
Ena nodrau veitalanoa tiko na turaga oqo kei Matararaba, taroga sara vua o Matararaba se cava e maroroya tiko kina na i moto oya.
E tukuna ni oya na i moto ni nodratou kawa, ka maroroya tiko me rawa ni ratou vuli vinaka na luvena.
A mani tarogi koya sara o Matararaba, se ratou sa vuli vinaka tiko ratou na luvena?
Kena i sau, ni sega, eratou mai yaco koso tikoga ena nodratou vuli, ka sega ni dua e bau yacova madaga na Fomu e cake ena sekeniri se ki na univesiti, e kaya o Matararaba.
Tukuna sara vua na turaga ni Dawasamu oqo o Matararaba, ni kevaka e vinakata me na mana na veika e vinakata, e dodonu mena vakacabo i soro taka e dua na wekana voleka, me nona i madrali.
E kaya o Matararaba ni sa besetaka sara ga o koya na turaga oqo na via mai vakabekabea tale tiko na vakatevoro vakaoqo, e vuluvulu sara ga mai kina, ka laki vakasuka tale na i moto oqo.
E vakatu oqori e so na noda bula na kawa i taukei ena veigauna sa sivi, ena nodra dau maroroya tu eso na veika era nanuma ni na vinaka kina na nodra bula ena vuku ni vakabauta makawa nodra na noda qase, e kaya o Matararaba.