ERA sa nanamaki tiko na lewe ni yanuyanu o Moce e na nodra na cerevi ira na nodra lewe ni timi qaqa ni Kirikiti e na nodratou vakadruka na timi ni Suva e na macawa ni Siga ni Mate. E vakaraitaka o Cakacaka Sau yabaki 40, na dauniveivakatavulici ni timi ka dauqito talega ni ra sa vakarau tiko na koro e rua mai na yanuyanu o Moce.
Au sa ciqoma oti na qiri mai nakoro e na nodra vakaraitaka na nodra sa vakavakarau e na kena solevutaki na timi, e kaya o Sau.
Na neitou qaqa ena sota kei Suva e na fainala e sega ni ka ni kidrotaki, e na vuku ni keitou sa vakavakarau sa ra mai vakavinaka, e kaya.
Na turaga qo o Sau mai Moce e sa yabaki 12 na nona vakaitavi tu mai e na cakacaka vakailesilesi ni tabana ni veivakatorocaketaki e na qito qo na kirikiti e na yasana vakaturaga o Lau.
E sa yabaki tolu na nona matataki Viti e na qito qo na kirikiti.
Na neitou timi qo na timi ni Moce e keimami gole kece mai vanua ka sega ni dua na caravou e tiko i Suva.
E na veisiga Vukelulu kece keimami dau qito kirikiti kina mai na koro ka dau va tiko na timi keimami dau sotasota tiko, e kaya o Sau.
Era lewena tale tiko ga na timi ni Moce e vica na gone ni Moce ka ra matataki Viti oti e na qito kirikiti oya ena yabaki 15 (Under 15).
Na luvequ talega e keirau qito vata tiko ka a lewena na timi ni Viti vei ira na yabaki 15. e kaya o Sau.
E sa rawata talega o koya na nona i vola ni Development Officer e na Level 1, e kaya.
Nida raica na timi ni Moce e sa rauta me ratou qaqa e na vuku ni nodra tuberi e na lotu, na bula ni tu vaki vinaka ni yago e na kena vakatabui ka qai vakauasivi na kena dei na vanua e na veitokoni me tekivu mai delaniyavu me yacova na nodra mai tiko vakaqito e Suva ni bera na nodra lesu tale.
E vakaraitaka na manidia ni timi o Viliame Taufa nira veivakani tiko e Suva o ira na gone ni Moce era tu vakacakacaka.
Era mai qaravi keimami tiko e na neimami mai qito tiko qo o ira na gone ni Moce era cakacaka tu qo e na vanua ni cakacaka, e kaya o Taufa.
Ia , mai nakoro e ratou veiqaravi na va na mataqali e na koro e rua oya na mataqali o Gasau, mataqali o Qali, mataqali o Kamali kei na mataqlai o Narocake, e kaya.
Ni cava na qito e na macawa ni Siga ni Mate e sa vakaraitaka talega kina o Cakacaka Sau ni sa mai lili talega kina na nona vava ni qito kirikiti.
Au sa vakaraitaka vei ratou na timi ni na oti na qito au sa na vakaliliga kina noqu vava ni qito, e kaya o Sau.