ENA i lakolako mai Kabul ki Jalalabad, e a vakaraici iratou nona ligai matau o Kanala Dalton Fury, ka nuidei ni ratou na rawata vakavinaka na i naki eratou talai kina. Eratou lewe lima tiko na satini mejia ka ratou tu sara e cake ena i vakarau ni veivanavanai ka sa laurai ga e matadratou kei na yagodratou na yabaki tini vakacaca ni vakasota kei ira na dauvakacaca.
Eratou sa vakaitavi oti e na vuqa na veiqaravi ena nodra vakamatei e vuqa vei ira na meca ka ratou dui qarava yadudua nodratou dui operation me vaka na inaki e ratou a talai kina.
E vica vei iratou sa taqa oti e seredratou na Silver Star, na i katolu ni i covi cecere duadua ni vala e na mataivalu levu ni Amerika.
Era lewe 45 tiko ga na lewe ni nodratou timi ka tiko nodra yabaki ni bula mai na yabaki 23 ki na 38, sai ira era sa vakadinadinataka nodra digitaki ena wararasa ni veika era cakava ena veibuturara rerevaki ni vakasota kei ira na dauvakacaca e na veiyasai vuravura era sa vakaitavi oti kina.
E lewe tale tiko ga ni lakolako oya o Adam Khan e dua na lewenivanua e Amerika ka a sucu mai Afghanistan. O Khan e dua na lewe ni mataivalu ni Marine e liu, ka ratou tauri koya na tabana ni CIA ena vuku ni nona kila vinaka na vosa lelevu e rua e Afghanistan, na Pashto kei na Dari, ka vakakina na vosa ni veiyasana.
Ni oti ga e dua na siga na kena vakacabotetaki na vale babalavu e rua na Twin Towers e Niu Oka, a sasaga o Khan me lai raica na vakacaca ka kilakasamitaka ni oya e cakacaka nei Osama bin-Laden, na tagane ni Oman ka sa lai dabe toka mai Afghanistan.
A katibati o Khan e na nona cudru ka vinakata me vakaitavi ena dua na i valu e valuti kina o Osama.
E na yakavi oya, e yaco yani kina vua ena talevoni na taro mai vei iratou nona iliuliu ena CIA: Vakaevei, sa rauti iko tiko ga mo dadabe ka rogo i tukutuku tiko ena walesi kei na retio yaloyalo e Amerika, se o vinakata mo lai vakaitavi sara ga ena ivalu ka mai lewe ni veitukutuku e mai kacivaki? Sa bole sara ga e keya o Adam me lesu tale ki na nona vanua ni sucu mai Afghanistan me lai vakaitavi e na vakasasataki nei Osama bin-Laden.
E siviya ni 12 na auwa na i lakolako mai Kabul ki Jalalabad, e berabera vakalevu ena ituvaki ni gaunisala kei na levu ni gasaukuro buluti (mines) ena vuku ni veivaluvaluti dede era vakayacora tiko na lewe ni Mataivalu ni matanitu ni Taliban kei ira na mataivalu ni lewenivanua mai na Vualiku na Afghan Northern Alliance.
Sa qai kuria na ca ni gaunisala ena nodra bololaki Kabul kei na veisalatu lelevu na waqavuka lelevu ni Amerika ena vula o Noveba kei na Tiseba ni 2001 ni sa cakacakataka na mataivalu ni Amerika na lewa nei Peresitedi George Bush mera valuti ka sagai me vakawabokotaki na i lawalawa ni Al-Qaeda kei na matanitu ni Taliban ka veiliutaki tiko e Afghanistan.
E vakabera talega na i lakolako oqo nodra tataro e gaunisala e vica vata na i lawalawa ni veiyavusa; e dredre vakalevu na i vakarau ni cakacaka vata kei ira na lewe ni veiyavusa baleta e duidui na nodra i le ka duidui talega na veika era dui vinakata.
E tarovi vakatolu na matailakolako mai Kabul ki Jalalabad ni ratou kaya e dua na yavusa ni ratou vakatulewa ena yasana oya, ia, vakalailai ga ki liu, ra curu tale mai na lewe ni dua na yavusa e kaukauwa cake ka ra kaya ni nodra na yasayasa oya.
Na ka e vakarerevaki kina ni ra vakaiyaragi kece na tagane qase kei na cauravou, ia ni sa gole cala ga na veivosaki, era sa via veivana sara. Sa nei Adam Khan ga na ogaoga ni nodra vakamasuti, ka solia nona i gu me taqomaki ira nona lewenivanua mai Amerika.
Ko ira na lewe ni Delta, ka ra vodo tiko e na va na lori lelevu, sa toka ga na ligadra ena nodra dui yaragi ni ratou sega ni kila se cava e na yaco tarava.
Me vaka ni ra vakumi kece ka vakaisulu babalavu na lewe ni Delta me vakataki ira ga na kai Afghanistan, era sega ni bau siqema vakadua na lewe ni veiyavusa ni ra vakaiyaragi tiko na pasidia, ka ni ra dui vunitaka toka nodra iyaragi verevereya ena loma ni nodra isulu babalavu.
Nai ikatolu ni kena tarovi na lori, e rogo vata mai kei na dua na i vakaro, ka sega ni bera na nodra sa dui lade na lewe ni mataivalu ni i karua ni yavusa era a veikau tiko yani ni ra sa vaqara vanua mera dui dro kina.
Na i katolu ni mataivalu vakayavusa oya e nei General Hazret Ali, na i liuliu ni mataivalu ena Tokalau, na Eastern Alliance Army ka ra sa vakatulewataki Jalalabad tiko ena gauna oya.
Sa i General Ali talega na turaga sa vakotora kina nona vakanuinui na CIA me ratou cakacaka vata ka vakakina ko iratou na Delta, ko iratou ka na mai qarava na itavi ni nona vakasasataki o Osama bin-Laden.
E na tiko na CIA me na vakarorogo ki na nodrau veivosaki na i liuliu ni Delta Force, o Kanala Dalton Fury kei General Haret Ali.
Na CIA e sega wale ni kilai ena cecere ni gaunisala ni nodratou tobo i tukutuku vuni kei na nodra talai na yamata vuni ni Amerika ki na veiyasai vuravura se nodra saumi na yamata vuni ni veimatanitu tani me ra soli tukutuku talega vei Amerika (double agents).
E kilai tani tale ga na CIA ena nodra dau saumi ena uma ilavo levu sara na iliuliu ni veimatanitu, se iliuliu ni so nai lawalawa e vakabauti ni rawa ni ra tokoni Amerika.
Sa kila tiko o Kanala Dalton ni ko George, e dua vei iratou na iliuliu ni CIA e Afghanistan esa dau veitalanoa tiko vakavica kei General Ali. E na gauna ga e dau lai tao kina na veivosaki, e talai ki tuba e dua na vakailesilesi ni CIA.
Ni lai curu lesu tale mai sa roqo toka mai e dua na kisi kau vakaitamera ka dabani koto e loma na noti $100 ni Amerika ka ra vesuvesu toka me tauya $250,000.
E sega wale ni dau bera ni sa tavuki na i rairai kei General Ali ka tamoi talega na i tosotoso ni veivosaki me sa vakadonui vakatotolo na veika eratou vinakata na CIA.
E vica vata na kato kau vakaoya era sogo tiko e na valenivolavola ni CIA e Jalalabad kei Kabul ka toka kina e tini vakacaca na milioni na dola ni Amerika, me ivoli ni veivakabauti, na i yaragi kei na kedra imari na kai Afghanistan.
Ni ra yaco yani ki Jalalabad na lewe ni Delta, era veisau, vakayakavi ka moce.
Ia o Kanala Dalton Fury sa osooso vakalevu nona vakasama me tuvalaka na itukutuku me tukuna vei General Hazret Ali.
O General Ali e sega ni se tiko e Jalalabad ena siga oya ka ni talevi ira tiko nona veimataivalu era yadra tiko e loma ni vanua.
Sa kila tu o Kanala Dalton, ni kevaka e vakotora cala nona itukutuku ka ratou sega ni marautaka nona iliuliu mai Wasgington, sa na yaco mai e na bogi ka tarava na ka era dau rerevaka duadua ko ira e soli vei ira e so na veiqaravi bibi vakaoqo.
Aya ni sa na kele mai na elikoputa loaloa levu ni Amerika na Black Chinook me ra vakavodoki lesu kina ka na vakasiroi talega kina ki na dua na i tutu e ra. E na mataka ni siga me rau sota kina kei General Ali, sa vaka ga e rogoca votu tiko o Kanala Dalton na rorogo ni elikoputa oya.
Era sega ni tiko voleka ekeya na i liuliu lelevu ni veitabana vakaivalu ka a nanuma taumada o Kanala Dalton me ra na tokoni koya ena nodra uqeta na yaloi General Ali me rogoca ka muria na ile se kerekere nei Amerika. Sa tu duadua sara tu ga o Kanala Dalton, ka sa kila tu na kena rui bibi me vesuka na yaloi General Ali ka me rawai koya sara.
Sa qarauna kina nona i tukutuku mai na kena itekivu me yacova ni cava.
Ni oti oya, sa qai vulica vagumatua me rawa ni nanuma vinaka taucoko nona vosa.
E vakaoqo nona lewe ni nona vosa me tekivu kina:
Koi au ko Kanala Dalton Fury, na iliuliu ni dua na matailawalawa dauvala ni Amerika, ka talai keitou mai na neitou matanitu me vukei iko ena nodra valuti na mataivalu ni Al-Qaeda ka vakakina nona tauri o Osama bin-Laden. Keitou talai talega mai kei na dua na yalayala ni sa vakarautaka tu noqu matanitu e dua na uma i lavo levu sara me soli vei iko kei ira na kainomu, ke vaka sa rawa vakavinaka na sasaga keitou talai mai kina.
E rawarawa ka matata na inaki keitou talai mai kina, aya me vakamatei o Osama bin-Laden se me tauri vakavesu. Kevaka e soro o bin-Laden, ia me soro ga vakadodonu ka me kakua ni dua tale na ka e lavaki vata mai.
Ia kevaka e vakamatei o Osama bin-Laden, e gadreva na noqu matanitu na i vakadinadina ni mawe ni ligana, na kena itaba, kei na i vakadinadina ni yagona na DNA. Kevaka dou vakaberaberataka se tarova neitou raica ka tara sara na yagoi bin-Laden, ena vakaberai se sega sara ga ni soli na ilavo sa yalataki ni na soli vei kemudou.
Au via vakabibitaka ni datou na to vata ena ivalu oqo.
O au kei ira na noqu lewe ni lawalawa, keitou sega ni qara na yaca qoroi, na i lavo se dua tale na ka me baleti keitou - keitou vinakati bin-Laden ga.
Ia ni bera niu talai ira noqu tamata ki na iyatu e liu ni kabakoro kei na veiraravui, au vinakata mo vakadeitaka vei au e tolu na ka:
Matai, me ratou lako vata tiko nomu lewe ni mataivalu kei iratou na noqu ka mo dou taqomaki iratou na noqu ni ratou sa lakovi bin-Laden cake ki na veiulunivanua. Kena i karua, e na kena gadrevi me ra kakua ni veivanavanai na nomu lewe ni mataivalu kei ira na noqu, au kerea e lima na nomu tagane dauvala me ratou mai lako vata kei iratou na noqu cauravou ka vakatakila na kedra duidui o ira nomu lewe ni mataivalu mai vei ira na lewe ni mataivalu ni Al-Qaeda ena veiulunivanua na Tora Bora.
Ko iratou oqo me ratou tiko vakadua kei keitou me yacova ni oti na ivalu mai na ulunivanua: Keitou na vakani iratou , taqomaki iratou ka vakaisulutaki iratou vakavinaka e na isulu katakata. Kena ikatolu, kevaka e sa mani kaba vakasauri mai na mataivalu ni meca, au vinakata na nomu veivakadeitaki ni ko na kaciva e dua tale na nomu mataivalu me mai vukei iratou noqui lawalawa.
Sa vakadeuca na nona vosa o Kanala Dalton ka sa vakadeitaka ni sa o koya oya na lewe ni nona veivosaki kei General Ali.
Na veivosaki talega oya sa na vakatautaki kina nona yacovi se sega o Osama bin-Laden ena veiqaravatu sa lai vakoro tiko mai kina. Ena qai tomani tale yani ena macawa ka tu mai.