E VEIVAKASALATAKI tiko na Matabose ni Dauvolivoli vei kemuni na lewenivanua Dauvolivoli, se dau vakayagataka vakawasoma na nodra veiqaravi na dau caka ulu, mo ni mai raici ratou kevaka a vakaleqai na caka ni ulumuni ena dua na gauna.
E mai vakavuna na kaci vakararaba na nodratou sa lomaleqataka tiko na Matabose nai vakatagedegede ni veiqaravi ni caka ulu ena noda vanua ena gauna edai.
Enai ka 27 ni siga ni Fepurueri, e ratou ciqoma na Matabose edua na kudru mai vua edua na goneyalewa yabaki 21 ka vuli tiko ena koronivuli torocake.
E mai kudruvaka na goneyalewa oqo na kena mira na uluna ni oti ga na kena lai vakadodonutaki ena dua na vale ni caka ulu rogo ena koroturaga i Suva.
E sauma e $100 me lai vakadodonutaki na uluna ka ratou qai vakayagataka eso na wainimate ni caka ulu ka vou vua, sega talega ni kila. Ena gauna me ratou biuta kina na uluna ena ruku ni dua na misini me vakatakatai, ni oti ga edua na aua sa tekivu me mira na uluna.
Ena gauna e mai vakaraitaka kina vua na Matabose na uluna, ratou qai kere vakasala mai vua na kena dau me baleta na leqa oqo ka mai laurai ni rauta e 80 na pasede ni uluna e mimira baleta na wainimate e vakayagataki kina ka na mira kece na uluna ni bera ni na tubu vinaka tale mai kina.
E vinakata ga me vadeitaka na Matabose, ke tiko tale eso na lewenivanua e ra a lako curuma beka na leqa vata tikoga oqo ka ra sega beka ni kila na vanua me ra lai vakaraitaka kina na nodra kudru.
E veikacivi tiko gona kina na Matabose vei kemuni na vakaleqai na caka ni ulumuni mo ni mai raica ga edua na nodratou vale volavola.
E gole tale tikoga na kaci oqo vei kemuni na dau caka ulu ena vei vale ni ulu eso ena noda vanua, ke tiko eso na nomuni kisi ka yaco talega kina na leqa vata tikoga oqo mo ni mai veitalanoa mada vakasavasava kei ratou na Matabose ena kena sagai me vukei na leqa oqo.
E sa gadrevi me yadravi na vale ni caka ulu ena noda vanua.
E vakabauta talega na Matabose me ra yadravi tale na yaya ni caka ulu kei na yaya ni sasauni ena noda vanua me taqomaki tiko kina na Dauvolivoli ka me kua ni vakacacana na nona bula se kena i rairai.
Me vakotori edua nai vakatagedegede ni yaya ni caka ulu kei na sasauni e ra curu tiko mai ena noda vanua me vakalailaitaka na leqa oqo.
Ni sa vakasalataki tiko na Dauvolivoli mo ni dau tarogi ira na dau caka ulu se cava na wainimate e vakayagataki tiko ena ulumu ena gauna e caka tiko kina.
Ke dua na wainimate ni caka ulu o sebera ni rogoca iliu se kila, ia mo taroga se cava ena cakava vei iko kei na veika matalailai me baleta na wainimate e biu tiko ena ulumu.
Ni qarauna na vale ni caka ulu o ni digitaka me lai caka kina na ulumuni.