E DUA na ka na nodra dau vakayacora na noda qase e so na i vakarau ka rawa ni kilai rawa kina na veika e se bera ni yaco.
E da kila vinaka na i talanoa ni vakawirimadigi ka vakayacori mai Nakauvadra e na kena sagai me kilai se o cei e rawa ni vakatakila na veika e rawa ni caka e na kena sagai me vakamalumalutaki na nodrau koro na veitacini o rau na Ciri kei ira na Mataisau.
A mani vakayacori kina na vakawirimadigi ka mani dusi Bakadruti na madigi ka tukuni vua ni o koya na kawa ni Daurairai e na rawa ni kila na cava e rawa ni vakayacori.
Ia, e a sega ni cala na vakawirimadigi oya ka ni a qai raica o Bakadruti na qaqa ni Kubuna oya ko Ratu Vueti e na rawa ni vakamalumalutaki ira na mataisau kei rau na veitacini.
Ia, e na loma ni koro vakaturaga o Naqelewai e tiko kina e dua na turaga yabaki 51 e yacana o Manoa Vakatawabai e nona i tutu vakavanua na qase ni turaga e Nabobuco ka nona mataqali o Bureca ka nona tokatoka o Lau.
Na qase qo e tiko vua e dua na i solisoli levu oya ni kila vinaka na veika ni se bera ni yaco.
O Vakatawabai e tiko vua na solisoli me dau cakava na vakawirimadigi.
Oya e na nona dau vakayagataka e vitu na gasau kei na vitu na tiki ni sulu me dau viviraki e na tolo ni gasau ka dau musu vakamatau ka qai mai vakadavori yani vakamatau e na dela ni ibe.
A mani vakatarogi o Vakatawabai se cava na vuna e vakayagataka kina na gasau?
Au vakayagataka ga na gasau ni oqo na kau e ra dau vakayagataka vakalevu na qase e na gauna e liu me dau sauvaki ki na na were kei na ke nai karua e dau i drau talega ni bure na gasau ka levu na kena yaga vei keda na i taukei, e kaya o Vakatawabai.
Na noqu wilika me vitu na gasau, oqo na mata ni vika e dau nona mata ni vika na Kalou, e kaya o koya.
E na gauna e sa tuvaki oti tu ki na na gasau e qai dau taura na i Vola Tabu ka biuta yani e delani gasau ka qai sala muria e na nona cabora e dua na qaqa ni masu.
Na masu oya me dau qaqa kina se me taroga kina na taro e via taroga.
E vakaraitaka o Vakatawabai e tabu ni dau vakayagataka o koya na vakawirimadigi me dau tukuni ira na dau vakatevoro se qaravi tevoro.
Na noqu gasau e tabu ni dau veivakamaduataki se veidusi, e kaya o Vakatawabai.
E ra vakaraitaka na cauravou ka ra veitomani tiko e na siga oya ni dau dina taucoko na veika e vakaraitaka na gasau.
E vakaraitaka o Ratu Waisea Bulaikalou ni ra sa dau kila rawa ni qaqa se druka o Naitasiri ni bera ni qai mai qito na timi oya e na nodra dau taroga e na vakawirimadigi.
Keimami i ke, ni sa dau tukuna ga na gasau ni druka o Naitasiri keimami sa dau sega saraga ni lako i sara qito ni keimami sa kila ni sa na druka, e kaya o Bulaikalou.
E sega vakadua ni cala na veika oya.
E na noda vakaraica na veika e vakayacora e na vakawirimadigi o Vakatawabai e sa ka dina ga vakalou ka ni vakayagataki ki na na Vosa ni Kalou ka cabori na kena masu, e sega ni da raica me vakayagataki e dua na ka tani me da rawa ni siqema kina ni duatani na kaukauwa e vakayagataki tiko.
E da na kidroataka na macala ni vakawirimadigi ena gauna e sa dau sere ki na na wa mai na gasau. Ia keo via kila na matailalai ni veika ni vakawirimadigi, e dodonu mo ni na cabe sara vakadodonu vei ratou na turaga ni Nabobuco ka ni kena dau na nodratou qase na vakawirimadigi.