ENA veiqaravi tiko me tolu na yabaki na cakacaka ni veivakasavasavataki ena loma ni yasana o Kadavu, ka ra na sikovi kece na lewe ni koro taucoko ena loma ni yasana, me vaka e vakaraitaka na Lotu Wesele.
E vakamacalataka tiko mai ki na Nai Lalakai o Nai Talatala Ili Vunisuwai, na vunivola ni veivakalotutaki mai na valenivolavola liu ni sa laurai tiko e levu na veisau ena vuku ni nodratou porokaramu oqo.
Dina ni tiko na tatawasewase ena loma ni koro, ia, na veivakalotutaki oqo e sa kauta tiko mai na yalo vata.
Na waigaga ni veivakamatenitaki, na mariwana, e vaka me lako vata ga na kena kunei mai na mariwana kei na veivakalotutaki.
Na nodra vakabulai na lewenivanua vakayalo, e kaya o Talatala Vunisuwai.
Ena vuku ni cakacaka levu oqo, era veivuke tiko kina na veiwasewase e Viti Levu ena nodra soli ira mai na lewenivanua (volunteers) mera mai veivuke.
Era sa lesu oti e Kadavu ena veivakalotutaki o ira na lewe ni Wasewase o Suva, Suvavou, Nadroga, Ra, Naitasiri, Navosa, Rewa, Verata, Lami kei Vuda, e kaya o Talatala Vunisuwai.
E vakadeitaka o Talatala Vunisuwai ni na qai mai sota na cina ni veivakararamataki oqo ena Tabacakacaka e Ravitaki ena i ka 6 ni Jiune.
E rua tiko na i wasewase ni vakacabe cina, e dua na i lakolako mai na mua-i- ra kei na kena e mua-i-cake.
Ena gauna oqo esa tiko mai na Tabacakacaka o Naceva e na mua-i-cake kei na Tabacakacaka o Yawe ena mua-i-ra, e kaya o Talatala.
Sa vakadeitaka ni sa toso vinaka sara tiko na veivakalotutaki kei na nodra yalo vata tiko na lewe ni lotu.
Na kena kerei na porokaramu ni veivakasavasavataki oqo era a kerea ga yani ena loma ni matabose ni yasana, ka qai kau cake ki na lotu, ka sa vakayacori sara ena tekivu ni yabaki oqo.
Na i naki ga ni veivakasavasavataki oqo, e kaya o Talatala Vunisuwai ni vakayacori tikoga na veivakabulabulataki ena loma ni yabaki dua, oya ena yabaki oqo.
Na kena vakacaberi na rarama, oya na vuna e caka tiko kina na vakawaqa cina ena veitabacakacaka kece e 17.
E 82 kece na veikoro, ka 9 na Tikina ena loma ni yasana, e kaya o Talatala Vunisuwai.
Ena yabaki mai oqo ena caka kina na veivakaduavatataki kei na veivakasavasavataki.
Sa nanumi tiko me i otioti ni yabaki e na vakayacori kina na porokaramu ni cavu i sausau kei na Toso ki liu e na 2014.
Tukuna o Talatala Vunisuwai ni nona lesu mai ena macawa sa oti, e laurai ni levu na lewenivanua e Kadavu era sa veitokoni sara tiko ena vuku ni cakacaka oqo.
Eso na lewe ni tabacakacaka era sa vakatatabu oti tu, se lolo oti tu me dua na vula era qai yaco yani na veiqaravi vei ira ena kena qaravi na veisiko ena veivale kece ena loma ni veikorokoro e Kadavu.