SA tekivutaka na nodratou veivuke na Kauveilatai Damudamu ena kena veikauyaki na i yaya ni veivuke vei ira na wekada mai Sigatoka me kauta vaka ki Nadi.
Vakaraitaka o Keith Andrews, na i vakailesilesi ni tabana oqo, ni ratou sa tawana oti e rauta ni 300 na kateni na i yaya ni veivuke vei ira na wekada era mai vakaleqai ena ualuvu siga lima, ka levu vei ira na wekada mai na yasayasa vaka- Ra era mai vakaleqai kina.
Na i yaya era tawani tiko ena nodratou i yaya ni veivuke na Kauveilatai Damudamu e wili kina na nodra i sulu na gone, na i sulu ni qase, na i tutuvi, na tavuleni kei na tewelu.
E dua tale na i yaya eratou veisoliyaka na kuro ni vakasaqa.
E tiko talega na misini e dau vakasavasavataka na wai eratou sa biuta tiko ena veivanua e vakaleqai na medra wai ni gunu ena ualuvu ni Janueri.
Esa tu vakarau tale tiko ena gauna oqo na Kauveilatai Damudamu kevaka ena kerei yani vei ratou na iyaya vata oqo mai na Mua i ra ni noda vanua.
Tukuna o Andrews ni sa gole oti kina yasayasa vaka- Ra e dua na keria levu ena Tusiti sa oti, ena kena laki vakacokotaki talega na nodratou dui tabana ena iyaya ni veivakacokotaki.
E vakavinavinakataka talega na tabana ni Kauveilatai Damudamu na levu ni lewenivanua era sa gole tiko yani ena nodratou valenivolavola e Suva, ena nodra solia na nodra gauna me ra laki veivuke ena kena vukei na nodra bula na wekada era vakaleqai ena waluvu ena macawa sa oti.
E laurai ni levu na turaga matua, era laki veivuke tu ena tabana ni Kauveilatai Damudamu ena kena tawani na nodra i yaya na wekada era vakaleqai ena ualuvu.
Eratou namaka me ra na vukei e udolu na lewenivanua e Viti Levu ka tarai ira na leqa ka levu era kidroataka na totolo ni cere ni wai ka bera na nodra vuki, ni sa waluvu mai na nodra i tikotiko.