E DUIDUI tu na kakana eda dau kilai tani kina ena noda veikoro vaka-viti. Ia ena bati ni uciwai na Rewa, e ratou dau kilai tani tu na koro e lima oqo ko Nakini, Natoaika, Nacokaika, Deladamanu kei Naganivatu ena vuku ni totoka ni lewe ni kai e ratou dau volitaka.
Ko Adi Fulori Dilolou, e dua na marama ni Naganivatu ena yasana vakaturaga ko Naitasiri au a sotava ena makete e Suva ni volitaki kai voli. Esa yabaki 25 ko Adi Fulori, ka tolu na luvena. O koya ka qase e vuli tiko ena kindergarten ka tarava e rau drua ka rau se bera ni vuli.
Ena dua na veitalanoa e a vakaraitaka kina ni dau silima sara ga mai vakaikoya ko Adi Fulori na kai ka me dau mai volitaki. Ia, e dau vakatau ga ena draki na levu ni kai e dau rawata ena dua na siga.
E dau vakatau ga ena draki na levu ni kai e dau rawa mai. Ke draki vinaka e rawa sara ni dua taucoko na taga se tolu toka ga na vokete, ia, ni dau levu ga na wai sa dau leqa sara ga,e kaya ena nona i vakamacala.
E sa wasewasei oti tu na veikoro e lima oqori au cavuta toka mai cake e na gauna mera dau mai volitaki kai kina ena makete.
E na dua na macawa e nodrau macawa na koro ko Naganivatu kei Deladamanu kei na macawa ka tarava e nodratou na vo ni tolu na koro ko Nakini, Natoaika kei Nacokaika. E vaka koto oya na kena i lakolako ena veimacawa kece sara.
Era tau ya $3 dua na i binibini na kai lalai kara tau ya $4 na kai lelevu, ia e tau ya $50 dua na taga. E na noqu tarogi Adi Fulori se vakacava toka na kena volitaki na kai ena gauna oqo, a mani vaka koto oqo na veika ea vakaraitaka; Ena gauna madaga qo e toso sara toka vakamalua baleta ni vakayacori tiko na nodra soqo ni lotu na wekada na Idia (Ram Naumi).
O ira oqo era sega ni dau vakayagataka na kai ena gauna ni nodra soqo ni lotu vakaoqo.
Ia, e vakaraiitaka ko Adi Fulori ni sa dau veivuke sara vakalevu kina nona matavuvale na i lavo e rawa mai na nona volitaki kai. E voli kina na i coi ni kedratou, soli ni marama, ka vakatalega kina na veika tale eso e dau lavaki mai e nakoro.