E DUIDUI na gaunisala ni noda rawa i lavo na veimatavuvale yadua. Eso era cakacaka vakamatanitu ka so era cakacaka e na kabani, ia, eso era vakayagata saraga na qele ena kena teivaki me rawa mai kina na i lavo ka vakatalega kina na bula ni matavuvale. Ena noqu a gole yani ena makete e Suva ena macawa sa oti, au mani sotava sara kina na marama oqo ko Vaciseva Galuvakadua, yabaki 47.
E vakaitikotiko mai Waibau, Naitasiri ko Vaciseva ka dua vei ira na marama ka dau volitaki senikau voli e na maketa levu oqo e Suva.
E lauta na mataqu na totoka ni senikau ka ra vesu toka vakamatau kei na kedra dui roka.
Ena neirau veitalanoa, ea vakaraitaka kina na marama ni Sawani, Naitasiri oqo ni o koya e dua vei ira na dau volitaki senikau makawa tu ena loma ni makete. A ya ena yabaki tini ka ciwa walusagavulu vakacaca ka se bera ni dau volitaki kina e tuba na senikau me vaka e na gauna oqo. Era dau volitaki talega vakayadudua na tabani senikau ka sega ni vaka i vesu. E vakaraitaka talega ko Vaciseva ni gauna talega oya se bera sara ni levu na veimataqali senikau me vaka era sa tu ena gauna oqo. Ia e dua ga na ka e levu ena gauna oya na Ginger torch.
Na cago e senikau rawarawa sara baleta ni da rawa ni tea ga e dua se rua na tabana sa qai dau dewa ka tete ni ra sa dau bula, e kaya.
E na gauna oqo sa levu sara na veimataqali senikau e volitaka ko Vaciseva me vaka na orchid, anthurium kei na ginger ena kena veimataqali.
E dau volivolitaki e na nona teveli mai na Moniti ki na Vukelulu e na loma ni makete. Na veika tale eso e volitaka me vaka na tavioka, vudi, rourou kara kau saraga mai na nodratou i teitei. Na kakana oqo era kau sara ga mai na neitou i teitei, kau dau mai volitaka sara ga na veika e tea na neitou Ta, e kaya na marama ni Sawani oqo.
Ia, mai na siga Lotulevu ki na Vakarauwai e qai dau mai volitaka kina na nona senikau e tuba me vaka ni oqori ga na siga e dau volitaki kina na senikau e tautuba ni makete. Na ginger kece era tau ya $3 dua na i vesu, kei na enthurium, na tigers kei na orchid era tau ya $5 dua na i vesu, e kaya ena nona i vakamacala.
Ena noqu a vakadikeva toka na bulabula ni senikau au mani taroga kina ki vua se cava e dau vakayacora me maroroya kina na nona senikau me kakua ni malai totolo se mate. E qai vakaraitaka ko koya ni dau mai ologi ira ga ena i sulu vakatoga suasua ni oti na kena musu mai ena yakavi ka me maroroya tale ga na kena vakavodoki mai ena basi ena siga ka tarava.
Vei ira na dau volivoli ena Lotulevu, e levu ga era dau volia me lai senikau ni nodra veivale ni volavola. Ia ena siga Vakaraubuka era dau levu na wekada na lotu Kavitu me ra vakayagataka ena nodra valenilotu ena siga ka tarava. E dau qai levu duadua ga na volivoli ena siga Vakarauwai me baleta na senikau ni valenilotu ena Siga Tabu. E dua ga na dredre e dau sotava ko Vaciseva, a ya ni so na gauna e dau vo na senikau ena yakavi ni Vakarauwai ka ra qai dau biu ena kava ni benu, ka sa dau lusi saraga. Ia e ka ni rarawa ni so vei keda era sa dau qai dau mai waraka ga mera mai tomika na vo ni senikau oqori mera kauta ki vale ni lotu ka ra sega ni mai volia na ka vinaka me kauta vei Jisu, e a kuria ena nona i vakamacala.
E vakaraitaka talega ko Vaciseva ni sa dau veivuke sara ga vakalevu kina nona matavuvale na i lavo ka rawa mai na nona volitaki senikau.
E ono na luvequ, ka vitu na makubuqu, ka sa dau vukei keitou sara toka ga na i lavo e rawa yani oqo e na makete. Ko Vaciseva e se qarava tale tiko ga na vuli nei luvena ka se fomu ono tiko e na koronivuli na Dudley High mai Turaki.