E LEVU vei keda e sa vaka me taura tu ga vakamamada na kena tosocake tikoga na i wiliwili ni kisi era sa vakaraitaki yani me baleta na i tovo ni veivaqaseni.
Ena nodra laki vakamacala na Tabacakacaka vakaovisa na leqa oqo, e laurai ni tara tiko vakalevu na noda i tikotiko na i Taukei na leqa oqo.
E laurai talega ni levu vei keda na veitikotiko, eda sa kilai ira tiko na wekada era dau malumalumu ena yalewa, ena vakairoiro se ena nodra vakasagai na marama, eda sega ni via cakava e dua na ka. Eso na qase era dau soli i lavo vei so saraga na marama vakawati ena nodra vinakata mera moceri ira na yalewa.
Eso na gauna esa laki toki vei ira na goneyalewa lalai, yabaki 15 ka lako cake.
Esa vakadinadinataki na malumalumu oqo kei na i tovo tawa kilikili vakaoqo ena nodratou ripote na tabana ni ovisa, ena kena sa tauri oti tale e 91 na kisi ni veivaqaseni mai na loma ga ni va na vula oqo, mai na Janueri kina Evereli.
E ratou vakaraitaka na ovisa ni levu na kisi oqo eratou mai vakadeuca, e laurai ni levu na gone lalai kei na marama era mai vakamavoataki ena vuku ni vakarau vakasisila vakaoqo.
Na cala oqo e dodonu me da na domo dua me da na tucake ka tukuna ni ca na veika e caka tiko oqo.
E laurai ni so era sega ni kauwai ena veika oqo, vakavo sara ga ke sa yacovi dua na wekana voleka na leqa ni veivaqaseni oqo.
E laurai talega ni wekada voleka ga era sa dau cakava tiko na i tovo vakasisila oqo vei ira na luveda.
Na kena revurevu na i tovo vakasisila oqo, e sa laki laurai talega ni levu na luveda goneyalewa lalai era sa bukete dole tiko.
Tukuna o Turaganiovisa Atunaisa Sokomuri ni sa raica tiko mai na Tabacakacaka ni Ovisa ni veicala kece e dau laurai ena nodratou tabana, na i tovo vakasisila vakaoqo me vaka na kucu, na vakasagai ira na gone kei na yalewa, e sa vaka me ripotetaki tiko vakalevu ena veisiteseni ni ovisa.
E vica vata na kisi ni veivaqaseni eda dau wilika ka vakarogoca ena veitabana ni tukutuku, ena nodra dau weluci na goneyalewa lalai ena kakana, oti oya esa dau soli tiko na nodra i lavo me ra volia kina na veika era vinakata, me vaka na i yaya ni ukuuku, kei na i sulu era dau diva tu na yalewa lalai mera tokara.
Nira sa temaki ga ena i lavo kei na veika mera vakacegui sara, era sa cakacaka sara na kena turaga qo mera sa vakasagai ira ka moceri ira.
Ni yaco na i tovo vakasisila vakaoqo, e kauta mai na tiko vakaca ena noda tiko vakaveiwekani, e vakaseretaka sara ga na veilomani kei na veidinadinati e dodonu me dau tiko.
Na noda dau rokovi ira era qase vei keda, e sa na luluqa baleta ni so na gauna eda sa laki raici ira tale vakaca eso na wekada era taba qase ni ra rawa ni cakava talega na i vakarau vakaoqori.
E levu sara na veileqa vakaoqori e vakaseretaka talega na noda i tikotiko, kevaka e cakava o tamani gone vei koya na luvena yalewa se vugona, se vei nona daku na i akarau vakasisila vakaoqori, e rawa ni vakavuna na kasere ni bula ni dua na vuvale.
Na kena revurevu ni kena vakatarai tiko na valavala ca vakaoqo, e na sega ni dua ena tarova, ena kena rawa ni drodrova na veiwekani.
E ka bibi kina na noda sa lotu vakavinaka, me rawa ni kauta tani tiko na veika eda malumalumu kina na Kalou.
Kevaka eda na sega ni masulaka tiko na noda bula ka vakatara na kaukauwa ni Kalou me na mai cakacaka ka vakatawa tiko na noda bula, ia eda sa na sureti Setani saraga me na mai dabe ka vakatulewataka tu na noda bula ka vakayagataki keda ena nona cakacaka ni tiko yavavala kei na butobuto.
E ka bibi tiko vei keda na i taukei na veiwekani, na noda semata vakavinaka na noda veiwekani ka da vakaitovotaki keda ena i tovo vinaka, eda na duatani ka da na vakaraitaka tiko na veika vinaka e vakarautaka tu vei keda na Kalou meda na sotava.
Kevaka mada ga e tobo ka vakadinadinataka na i tovo e cakava, ka laki totogi e valeniveivesu, esa na kilai tu ga na wekada oya ena i tovo lolovira e vakayacora oya.
Kevaka ga e sa dukadukali tiko ga na noda vakasama, ka da vinakata tikoga me da tikoga ena bula ni butobuto oya, ia eda sa sureta sara tikoga na cudru ni Kalou ena noda bula kei ira era na muri keda mai.
Vei keda talega na i tubutubu, me da na qarauni ira vinaka na luveda ka meda vakatavulici ira tiko ena veika mera na qarauna tiko ena vuku ni so na wekada era sa sega ni tarovi ira rawa tu ena cakacaka ni veivaqaseni.