SA mai vakadinadinataki koya na matatimi ni kirikiti ni yanuyanu vakaturaga o Moce ni ka ga ni sucu vata kaya mai kei na taledi vata kei na kena yalo.
Ratou mai lave rara kina na turaga ni Moce e na veiliutaki maqosa nei Makutu Seru me ratou qaqa kina ena 85 na cici ka kovea tani mai vua na matatimi jabeni ni vitu na yabaki na Suva Warriors na i cocovi ni lagilagi.
Era lewena na timi ni Suva Warriors na veiyaca rogo e na buturara ni kirikiti e na noda vanua ka kuria oqori na levu ni kila era sa vakaiyaragitaki ira tu kina.
Era sega ni yalolailai kina na timi e gole sara ga mai vanua e na nodra kauta tiko ga mai na bula ni vakarau ni veisusugi mai nakoro, oya na rogo vosa se na domo dua.
Era yavutaki mai e na i vaqa vakayalo, ka ra muria taucoko na veika e gadrevi me rawati kina na qaqa.
Ra duavata mera tabu me vula dua na moce vata kei na yalewa, gunu yaqona, vakatavako kei na veika tale e so era kila ni na rawa ni vakalatilati ki na nodratou sasaga.
Kevaka esa vaka oqori na duavata ni yalo ki na dua nai tavi e sasagataki me rawati ka qai vakuri e na mana kei na sau ni vanua ka tasova mai Lagi, sa rauta me sega ni dua na ka e dredre ki na timi ni Moce.
Sa tu rawa na kena yalo kei na i gu ni sasaga.
Me vaka e vakaraitaka na nodratou dau ni veivakatavulici o Cakacaka Sau ni ratou se vakavakarau tu mai e na loma ni vula dua.
Era a lewena ga na timi ni Moce o ira era a tu ga vakanakoro. E dusimaka tiko ko ya ni taledi ni qito e tiko ga e na noda dui mata ni katuba ka sega mai na koro lelevu vakavavalagi, valagi se evei ga na vanua.
Sa rauta me marautaki sara vakalevu na qaqa ni ratou sa mai tauca rawa na vua ni buno ni vosota ni nodratou vakavakarau mai yanuyanu.
E vakabauti nira sa wawa toka na lewe ni koro e rua o Korotolu kei Nasau mera na cerevi ira na lewe ni timi e na vuku ni lagilagi e sa mai rawati.
Sega walega ni na reki o Moce, ia, o rau sara talega na yanuyanu veiwekani ka rau ciri volekata toka o Komo kei Oneata.
Ia, e na loma talega ni macawa oqo era a soqovi rau talega o Joeli Lutumailagi kei Metuisela Talebula, e rua na dauqito lewe yavitu o ira na dui wekadrau ena vuku ni lagilagi mai Ogo Kogo.
Oqori e na vanua e vasu kina o Joeli kei ira na wekai Metuisela, oya mai Oneata.
Sa na dua na ka na maue ni koro, ka sega ni kurabuitaki era na soqo vata yani ki Moce na veiwekani mai Oneata kei Komo mera duavata kei na marau vakaiyanaqa kei na malaude era na vakayacora.
Sa rauta! Sa dodonu me vaka kina. Sa dua na i vakaraitaki vinaka e sa vakacila rawa oqo ki Viti o Moce.
Kevaka e ratou sa rawa ni matanataka, ia, na cava e sega ni rawa kina vei Viti nikua e na buturara ni qito.
Vinaka vakalevu Moce na gugumatua kei na yalodei ni nanuma na vanua.