E VAKADEITAKA o Savenaca Qiokata, yabaki 60 mai na Tikina makawa o Tokaimalo nira a vakuvu buka makawa tiko ni bera nira qai yaco mai ki na noda vanua na i lakolako mai Taqaniika me vaka e tukuni tiko e na noda i tukutuku ni tawa vanua taumada. Kaya o koya era a sa tiko makawa e na noda vanua ni bera nira qai yaco mai na vo ni lakolako.
Sa i keitou oqo na vakuvu buka taumada e loma ni vanua, e kaya o koya e na dua na veitalanoa e na loma ni koro o Raviravi.
Tomana ka kaya na koro o Raviravi e vakaibalebaletaki ni a ravi taucoko kina na nodra i titoko na qase ena gauna makawa e na gauna era dau mai bose e ke.
E na i dewadewa mai Nakauvadra, oqo na i matai ni koro.
E vakaraitaka o Qio ni nona koro se yavutu makawa o Drekeniwai ka sa lala no e na siga nikua ka tiko vakalailai yani e cake mai na vanua e dabe tiko kina na koro o Raviravi e na gauna nikua. Ia, e na yasa ni koro oqo e drodro sobu e yasana na uciwai levu ka rau a sokota ravita na Ciri, o Kausabaria kei Cirinakaumoli e na gauna rau sa cemuri kina mai vei Waicalanavanua na tamadrau ena vuku ni valu ni toa.
E na gauna rau sa cemuri kina na Ciri e rua na turaga e rau qai mai sobu e Drekeniwai ka dua e yacana o Vukinavanua kei tacina o Maleli Saumaimuri se na Ratu ni Mali.
Me vaka ni ratou veimositi vakaveitacini, rau sa kila ni rau sa na gole vakadua na Ciri ka vaka kina na veika e rau sa kauta vata. Sa mani tarogi rau o Vukinavanua kei Saumaimuri o rau na Ciri se dua na ka e rau vinakata, e talanoataka o Qiokata.
Ia, e kuria ka kaya ni sa qai digia na saqa wai o Ratu ni Mali, ka digitaka o Vukinavanua na i su ni qele.
A sa via luvaiwale sara ga na noda vanua kevaka e rau a kauta kece na mana.
E kaya o Qiokata ni sa i rau sara ga oqo na i yau e na noda vanua e na gauna oqo. E tiko ruarua ga mai na colo kei Tokaimalo na kena i vakadinadina bula.
Ni o vano va qoi, dua na vanua e dau sisi tiko kina na qele. Ni gauna e sisi kina na qele kiou kila ni vakalougatataki o Viti. E yaca ni vanua ko ya o Naqelecibi baleta ni e cibitaki na qele. O rau na Ciri, e rau vano vakadua .
Ia, e vakadeitaka ga o koya ni tukutuku makawa ni noda vanua e tiko ga lomai Yaqara ka bula voli kina na Yavusa Tinikarua. Ni gauna rau sa vakarau veitalatala kina na veitacini o Vukinavanua kei Saumaimuri, rau sa qai vakatoka e dua na kedrau i vakananumi ni veisemati vakaveitacini, oya na Tako Kai kei na Lavo Kai.
Oqori e vakatakila na matavuvale, e tinia o Qiokata.