TAUMADA vei keitou na matavuvale me keitou na saravi koya (Waisake Naholo) ena matanavotu.
Oya na veika e vakaraitaka o Esala Nauga na dauniveivakatavulici ni timi ni Nadroga ena rakavi tinikalima ena vuku ni nona na mai qito tiko ena i matai ni gauna na timi nei Naholo na Highlanders ena sotasota ni Super Rugby.
“Au vakavinavinaka vakalevu ni rawa vei keda na lewei Viti me da na sarava saraga ena matanavotu na nona na mai qito o Naholo ena nona vanua dina,” e kaya o Nauga.
E kuria o Nauga ni dua talega na vuli vinaka vei keda na lewei Viti na qito e rau na mai vakaraitaka na timi ni Highlanders kei na timi ni Chiefs.
“E rau timi jabeni ruarua ena dua na gauna na timi e rua qo ena Super Rugby ka dodonu me da na namaka tiko ni vukivuki kei na kila ni qito e rau na vakayacora ena duatani mai na veiqito kece,” e kaya.
E kuria o Nauga ni da sarava na qito nei Niu Siladi e duidui vakalevu sara mai na qito nei Ositerelia kei Sauca Aferika.
E vakaraitaka tiko oya na toso kei na i vakagedegede ni qito e Niu Siladi e tiko sara e cake ena rakavi tinikalima.
Na timi ni Highlanders e cavutu mai Otago e Niu Siladi kei na timi ni Chiefs e cavutu talega mai Niu Siladi ena vanua o Waikato. Eda namaka tiko ni qito qo ena tiko sara e cake na kena i vakatagedegede.
“O Naholo esa bera vakadua ni daramaka na siqeleti ni Nadroga ena nona sa biubiu me la’ki qito voli mai Niu Siladi,” e kaya o Nauga.
Ia, e kuria o Nauga ni sa daramaka oti ga na siqeleti ni koronivuli o Cuvu College e Nadroga ena gauna ni vuli. Ena qito tiko o Naholo ena i tutu ni wigi ena timi ni Highlanders.
E solia na nona vakanuinui vinaka o Nauga ni na dua na qito vinaka ka veisureti raraba tiko o koya e na noda gole yani vakalewe levu me’da la’ki kailavaka na timi e rua ena rara mai Laucala.
Na timi ni Pulse Energy Highlanders ena sota tiko kei na timi ni Gallagher Chiefs ni oti na 7 ena 35 na miniti ena yakavi ni Vakarauwai ena ANZ Stadium e Suva.
