Sota na bici kei na kena i ula

SA totogitaki e dua na waqa ni qoli mai vanuatani me sauma e $20,000 e na nona beca na lawa ni tabana ni “Sea Ports Management Regulation ni yabaki 2008, e na kena tobo na waqa oqo e na nona pamutaka tiko na waiwai ki waitui.
E ratou sa vakadeitaka mai na tabana ni Fiji Ports Corporation Ltd ni a kidavi na veika sakasaka oqo e na gauna e kele tiko kina na waqa ni qoli e na wavu mai Muaiwalu e na siga Vakarauwai.
E ratou sa vakadeitaka talega mai na tabana ni FPCL, ni na qai rawa ni biuta na noda matasawa na waqa oqo e na gauna e ratou sa sauma oti kina na kedratou i totogi.
E ratou sa solia raraba talega na i vakaro na tabana ni FPCL ki vei ira kece na waqa ni noda vanua kei ira na waqa ni qoli mai vanua tani, ni ratou na sega ni taura vakamamada na benu ca e na i kelekele ni waqa.
Eratou tukuna talega na tabana ni FPCL ni ratou sega ni kila na veta i cake ni waqa ni qoli oya, na nodratou sovaraka tiko na waiwai ki waitui na lewe ni waqa ni qoli, ka ratou beitaki ira ga na kaimua e na tikina oqo.
Ratou sa kerekere vakabibi talega na tabana ni FPCL kivei kemuni na lewenivanua raraba me da veivuketaka na yadrava na noda i qoliqoli ka me da tukutuku yani ki na nodratou tabana ke kilakasamitaki e dua na mataqali leqa vakaoqo.
E kaya o Professor Anjeela Jokhan ka cakacaka tiko e na kena tabana mai na Iunivesiti ni Ceva, ni kena benuci tiko na noda wasawasa e na vakawabokotaka na veika bula era bula tiko kina.
“Na veika oqo e na vakamatea na noda i qoliqoli, e na vakadukara na noda i kanakana, ka kena i usutu ni na vakawabokotaki ira na veika bula e loma ni wai.
“Vuqa sara na ika e loma ni wai e se malumalumu sara na kulidra, ia, ni qai benuci tale tiko e na waiwai, au vakabauta ni sa na musuki koso na nodra vakawataki,” kaya o Jokhan.
E kaya na i liuliu levu ni Maritime Safety Authority of Fiji (MSAF) o John Tunidau ni ratou sa dau yadrava sara vakavinaka o iratou na FPCL na veiwasawasa e na noda vanua, me kakua ni benuci tiko e na veigauna, ka ni na rawa ni vakavu leqa e na noda i tikotiko.