Sitabataki na duavata

ENA siga Vukelulu ni macawa sa oti, e ratou a sainitaka kina e dua na veidinadinati na Tabana ni Veivakatorocaketaki ni Taudaku ni koro vakavavalagi (Rural & Maritime Developments, Disaster Management, and Meteorological Services kei na i soqosoqo ni Kauveilatai Damudamu e vuravura (International Federation of Red Cross and Red Crescent Societies )me baleta na kena vakavoui na lawa ni leqa tubukoso ni 1995.

E vakadeitaka na Vunivola Tudei ni tabana oqo o Meleti Bainimarama ni sega ni dua vei keda na lewe i Viti e na guilecava vakarawarawa na vakacaca e cakava na cagilaba o Winston e na yabaki 2016.

Na vuna gona o ya e ratou sa mai sainitaka kina na veidinadinati e na i tosotoso vou oqo, ka me rawa ni tu vakarau e na veigauna kece na tabana oqo, e na gauna e yacovi keda mai kina vakasauri e dua na leqa tubukoso me vakataka na cagilaba, uneune se covulaca.

Tomana o Bainimarama ni dua na gauna vinaka ki na noda matanitu e na nodratou sa mai sainitaka na veidinadinati me rawa ni ratou tu vakarau e na veigauna kece e gadrevi kina na veivuke.

Kuria ni kena sainitaki talega na veidinadinati e na macawa sa oti, e talevi tale kina na lawa ka a virikotori mai e na yabaki 1995, ka vakakina na 1998.

E kaya o Bainimarama ni kena sainitaki talega na i tuvatuva vou oqo e na vakarawarawataka na nodra raici na veitauni, na veikoro, na i tikotiko vagalala me rawa ni tu vinaka e na veigauna kece e oti kina e dua na vakacaca.

E vakavinavinakataka talega o Bainimarama na matanitu cokovata na European Union kei na Secretariat of the South Pacific (SPC) e na kena vakarawarawataki na duavata oqo.

Kuria o Bainimarama ni e na vuku ni matanitu e vakavinavinakataki iratou vakalevu na IFRC kei na Kauveilatai Damudamu e na noda vanua e na vuku ni veivuke levu oqo, ka nuitaka tu ni ratou na duavata tiko e na i lakolako vou oqo.