Sikovi talega ko Qarase

OQO na i toma ni nona i talanoa o Nai Talatala Sepesa Niumataiwalu mai na VIP Ministry.
E dau nona minisitiri na turaga oqo, oya na nodra sikovi o ira kece era tiko ena i tutu ni veiliutaki ena tabana ni matanitu kei ira era veiliutaki tu ena tabana ni bisinisi eso. Ena macawa oqo e talanoataka na nona laki sikovi Laisenia Qarase na i liuliu e liu ni matanitu ena noda vanua. Ni wiliwili sara yani.
E turaga yaloyalo vinaka ka ra buta tale tu ga ena cakacaka ni veiliutaki.
Au a bau lewe ni komiti ena ACCF na i soqosoqo vakalotu ka ra a tavoca ena yabaki 2001 na Turaga na Peresitedi sa bale, o Ratu Josefa Iloilovatu Uluivuda.
E a neitou i liuliu ko Reverend Tuikilakila Waqairatu mai na Lotu Wesele ka ra qai digitaki ena i tutu ni Qase Levu.
Ni dau caka oti na bose ni Palimedi ena veivula e dau kacivi keitou ko PM Qarase me keitou dau bose vata ka veiwasei. Ena yabaki ka rawa mai kina na World Cup ni mata timi lewe yavitu ena noda vanua, e mani vakayacori kina na kena marautaki na soqo levu oqo mai Laucala, ka dua na tamani soqo levu.
Mai kavetani ni timi ni Viti o Waisale Serevi.
E vakavica na kena vakayacori ena i tikotiko ni Peresitedi na katalau ka keitou dau sureti kina na Komiti ni ACCF.
E rui totoka dina vei au na gauna koya, ka ni ra dau sureti mai na tuwawa levu ni lotu va- Karisito me vakataki Benny Hinn, Louis Palau ka vaka me sema vinaka tiko na noda vanua ki lomalagi vua na Dauveibuli na Kalou levu vakaiukuuku.
Au vakabauta ni’u a i otioti talega ni Talatala ka’u a laki sikovi ira ena nodra vale ka’u caka lotu vua. Ka oti ga koya e sa yaco sara na kena tauri vakaukauwa na veiliutaki mai vei ratou na mataivalu ka mai yaco na veika eda sa kila vinaka tu ena 2006.
( Macawa mai oqo, na noqu sikova na noda i liuliu ni matanitu ena gauna edaidai, Voreqe Bainimarama).