Sikovi na veiliutaki

OQO na i kuri ni nona italanoa ni veisiko o Nai Talatala Sepesa Niumataiwalu mai na VIP Ministries ena nodra sikovi na turaga kei ira na marama era tiko ena i tutu ni veiliutaki ena noda vanua.
Na macawa oqo e talanoataka na nona laki sikovi Ratu Jone Kubuabola na Minisita vakacegu ni Veika Vakailavo ka liuliu talega ni Reserve Bank ena dua na gauna.
Kei na nona via sikovi Sir Timoci Tuivaga, qai kilaleca ni rau qai sota kei nona turaga tauvu o Ratu Mosese Tuisawau. Ni wiliwili sara yani.

Ratu Jone Kubuabola.

E dua na turaga yaloyalo vinaka ka turaga vuku talega.
Au dau sikovi koya ena veiveimacawa ka vakayaco lotu ena loma ni nona valenivolavola.
E turaga daucakacaka, ka turaga vakabauta ka rerevaka na Kalou, ena so na gauna au dau lako sara ki nodrau i tikotiko mai na Cakobau Rd ka’u dau caka lotu kei Adi Miri na marama lewe ni vale.
Ena veigauna ni Budget ni oti, au dau masulaka ena nona valenivolavola na Budget. Au diva madaga mera vakataki koya kece ko ira na noda veiliutaki,ka’u dau vakabibitaka vei koya me ra maroroya na nona bula vakamatavuvale.
E turaga dau veivuke talega vakalevu.
Me vakalougatataki ira tiko na noda Turaga.

Ratu Mosese Tuisawau Varasikete

Oqo e dua na turaga vuku talega ka ganedra na Marama bale na Roko Tui Dreketi ( Ro Lala Mara) mai na vanua vakaturaga o Rewa.
Ena dua na siga ni’u lesu mai vei Sitiveni Weleilakeba ( Fijian Holdings). Au a laki gunu ti sara ena dua na vale ni ti ni kai Jaina e ra.
E lako sara mai vei au e dua na vakasama me’u tovolea me’u la’ki sikovi Timoci Tuivaga na Turaga na CJ (Chief Justice) ena gauna ko ya.
Ia ni’u sa gunu ti tikoga e kea, sa lako sara mai e dua na turaga ka vakote balavu tu (overcoat) ka mai volivoli sara tu ena mata ni katuba levu ena sitoa.
Ni’u raica tu yani, au vakila ni sai koya sara ga oya na Vunilawa e Viti ko Sir Timoci Tuivaga.
Sega ni bera sa curu tale yani ki tautuba, au muri koya sara yani ka sa la’ki qiri tiko ena dua na talevoni ena yasa ni vale e kea.
Sa dua na ka na noqu marau ni’u sa kila ni sai koya sara ga na turaga ka’u laki via sikovi koya tiko.
Au la’ki tucake sara tu e dakuna, ia ni sa oti na nona talevoni sa vuki sara mai ka’u lululu sara yani ki vua ka vakabula, ka tukuni au sara vua kei na noqu cakacaka.
Au dau raici koya tu ga vakayawa ena so na soqo lelevu, ka vakakina ena i taba ena veiniusiveva.
Au tukuna vua ni ko au ko Sepesa Niumataiwalu, ka’u vakabauta ni keirau veitavaleni ena neitou tabana ki Nayau kei ira mai Matuku.
Ni bula vinaka tavale, au gadreva me’u bau veisiko tu yani ki na nomuni valenivolavola me vaka ni taba ni noqu veiqaravi na VIP Ministry.
Sauma sara mai ko koya, O! Bula vinaka tavale, sa vinaka me daru sa lako sara yani.
Au rai yani ki gaunisala e kele tu kina e dua na motoka levu, lako sara na noqu vakasama ni oqo e nona ka ni ko tavale e vakaitutu levu.
Ia ni keirau lako sivia, keirau lako sara ki tai kadua ki na vale ni wili vola na Suva City Library, ka curu sara ki loma.
E levu era wili vola tiko kina ka ra vagalala me keirau rawa ni dabe.
Sa levu na noqu marau ni’u kila e dua na ika vakaitamera e sa na coko oqo ki na loma ni noqu noke.
Me vaka e kaya na Turaga ko Jisu- “ Dou muri au, kau na qisi kemudu mo dou gonedau ni tamata.”
Keirau dabe sara ka ni sa lala ka ra sa toso tale ki na so na i dabedabe ko ira na dave tiko kina. E kea esa buebue tu e lomaqu me’u sereka vua esoi na veitiki ni Vola Tabu vakarerevaki, me vaka na nona vakarau lesu tale mai vakarua na Turaga ko Jisu. “ Na i vakatakilakila sa tu oqo e vuravura ena nona vakarau lesu mai na Turaga,” Na bukawaqa mai Eli sa vakarautaka tu na Kalou me na biu kina ko ira na tamata i valavala ca, oti au sa taro bula sara ka kaya, E vakacava ko via ciqoma na Turaga ko Jisu me nomu i vakabula, e vakadonuya sara ko koya, ka’u masulaki koya, ni oti keirau sa marau ruarua sara.
Ia au tukuna sara vua, “Tavale, au vinakata me dua na siga ena dua na macawa meu na veisiko tiko yani kivei kemuni ka me na vakaqaqacotaki tiko na nomuni bula vakayalo, ni sai koya saraga oqo na ka sara ga au dau cakava wasoma tiko.

Ia e tiko beka e vei na nomuni valenivolavola? Kaya sara mai ko koya, “ Oi, na noqu valenivolavola ni ko lako cake kina Century Theatre, oqo na valeniyaloyalo makawa, ko toso ki liu vakalailai e dua na i kabakaba e gole cake, e kea saraga na noqu valenivolavola.

E kea saraga kemuni na turaga kei na marama, au sa vakila kina ni dua na ka sa cala.
Oti au sauma ka kaya, Sobo tavale, au nanuma saraga ni nomuni valenivolavola e tiko mai na vale ni Tabacakacaka ( Government Buildings). Sa qai sauma mai ka kaya, Tavale! Koi au ko Ratu Mosese Varasikete, sega ni o Timoci Tuivaga.

E keya, na kena levu ni noqu madua, au mai ga vakabalavu tu yani ka ni’u sa sega ni kila na ka me’u tukuna.

E dredre sara ko koya ka kaya mai, “ Nai Talatala, kakua ni ko leqa, kedaru sa na veitavaleni tikoga vakadua.

Sa dua na kila leca vakaitamera au cakava tu oqo.

Ia, au qai vakasamataka ni sa dua na turaga vuku ka ni sega ni via vakamaduataki au ena gauna dede keirau mai veitalanoa tiko kina, ka ni ra vakaraici keirau tiko mai na tamata. Io, sa malo,! E muri ni keirau qai sota tale, sa keirau veikacivi tu ga ‘ tavale’. Ia na cakacaka ni Turaga, e kaya, “Dou lako yani ka tukuna. Kila leca se sega, mo bau tukuni Jisu ga!