Sema o Toga ki Bua

ENA dua na gauna makawa sara e tiko kina e dua na neitou Raluve mai na neitou koro makawa ko Nativi, e na Tikina ko Navakasiga ka ra dau veisisivitaka tiko mai na Ravouvou kece e na veiyasai Viti me ra la’ki taukena.

E sega sara ga ni bau dua vei ira na Ravouvou oqo e rawata rawa na neitou Raluve tabusiga oqo, ka ni ra sa yadrava wavokita vakavinaka sara tikoga na nona i tikotiko o ira na neitou yadra me kakua ni dua na Ravouvou e curu botea yani.

E vakadeitaka mai nai tukuni oqo ki na Na i Lalakai o Livinai Beya mai na nona loma ni vale e Baravi, Tikina ko Navakasiga, e na yasana o Bua, ena vula sa dromu.

Tomana o Beya ni ra dau sasaga yani na Ravouvou e na veiyasai Viti, me ra toso yani ki na nodratou Raluve, ia, e dreve na nodra i naki, ka ni veigauna kece era na kidavi mai vei ira na yadrava tiko na nodratou Raluve.

Toso tiko na gauna, era qai kidacala ga na yadrava tiko na nodratou Raluve mai Navakasiga ni sa tukuni yani vei ira ni sa kunekune, ka sa vula tolu tiko.

E kaya o Beya ni ra sega vakadua ni kidava se bukete vakacava o nodra Raluve, ia, na i talanoa ga e qai mai rogoca vei ira na nodratou qase, ni dua na bogi e a qai vakatubura mai e dua na vu ni nokonoko, o Ravouvou mai Toga Naqavoka.

Na gauna e sa vakamuria mai kina, e qai mai siro sobu sara ga e na dela ni vale nei Raluve tabusiga, ka yali tale yani vakasauri na vuninokonoko.

“E rau mai tiko e loma ni vale o ya, o Ravouvou mai Naqavoka kei na neitou Raluve me tolu na siga, tolu na bogi.

“Na i ka va ga ni bogi sa tatau tale vei neitou Raluve na Ravouvou mai Naqavoka, ka ni sa tara tale yani na dela ni vale na vu ni nokonoko mai Naqavoka.

“Era welewelei tu ga na neitou yadra, sa lesu tale ki Naqavoka na nodratou Ravouvou,” kaya o Beya.

Tomana ni gauna era sa rogoca kina na lewe i Navakasiga, sa duatani na nodra rarawataki iratou na yadrava tiko na nodratou Raluve.

Kuria ni gauna sa vakasucu kina na nodratou Raluve, e sa qai sega ni rawa ni lako tu na wai ni sucuna.

E kaya o Beya ni sa qai tala yani e rua na ganiviti na Ravouvou mai Naqavoka kei na dua nai su kai me la’ki vakasaqari ka gunuva na nodratou Raluve.

“Gauna e rau sa vuka yani kina na ganiviti, rau sa qai la’ki sovaraka na kai e na wai mai Aileya.

“Na nodra vakasaqara ga na marama na kai oya, ka soli vei neitou Raluve me gunuva na kena wai, e tadola vakadua na matani sucuna, ka taladrodro na sucu, ka sega tale ni qai tao vakadua.

“Sai koya o ya na vuna keitou veitauvutaki dredre sara tiko ga kina kei Toga Naqavoka me yacova mai na gauna oqo,” tinia o Beya