Sega ni vakalusi gauna

SA BAU dua na gauna balavu na neimami vakayagataka tiko mai na mataqali samu voivoi vaka oqo.

Oqori na veika e cauraka toka mai o Vinaina Racagi mai na koro ko Naviqiri, e na Tikina ko Navakasiga e na yasana ko Bua.

E matalia vei keda ni da se qai raica vakadua na mataqali samu voivoi vaka koya, ka ni sa matau ga na raici ira na noda marama ni ra wawalui toka.

Ia, na kena i cakacaka vakaoqo e ka vou sara ni da raica, ka ni da se yawa tu yani eda nanuma ga ni vakayacori tiko na samu masi.

E kaya ko Racagi ni mataqali samu voivoi vaka oqo e sega ni kania vakalevu na gauna, ka ni oti ga o ya, e sa tekivu sara na tali ibe.

Tomana na marama yabaki 52 oqo ni so na gauna e vesu vata e 50 se 80 na voivoi, ka ra qai mai samuta vata yani.

“Ni samu vaka oqo na voivoi, e sega sara ga ni wawale kina na ligada me vaka na wawalui.

“Dua tale ni dua na voivoi e kadresu tiko vakalailai, na gauna e ra samu vata kina, ena sega sara ga ni bau kasei sara vakalevu me vaka e yacovi ira na voivoi ka waluitaki.

“Na gauna talega e sa na tali kina na ibe, ena malumu na voivoi ka totoka na kena vulavula,” kaya o Racagi.

Kuria ni dau volitaki sara na nona ibe ki Nadi kei Suva, ka vuqa na gauna e dau voli ga e na veisa.

E kaya o Racagi ni i vurevure ni lavo vei ira na marama ni Naviqiri na tali ibe, ka vakakina na kena volitaki na nodra sasalu mai waitui.

Sa nona i vakasala o Racagi ki vei ira na gone yalewa ka ra sega ni rawata vakavinaka na nodra vuli, me ra yalovinaka sara, me ra lesu tale ki na nodra dui dela ni yavu, ka vulica matua sara na cakacaka vakamarama me rawa ni ra na liga kaukauwa tikoga kina e na veisiga ni mataka.