Sega ni qaravi vakavinaka

E vakaraitaka e Palimedi na Minisita ni Saukabula, matabose ni veitaoni kei na veilakoyaki o Parveen Kumar ni sega ni dau qarava tu vakavinaka na uciwai kei na kena taqomaki o ira na matanitu sa liu yani.

A sauma tiko na vakatataro o Kumar ena i tuvatuva e vakayacora na nona minisitiri ena gusu ni uciwai na Sigatoka.

Vakadeitaka ni sa solia mai na matanitu e rauta ni $890,000 me na veivuke ena kena tarovi na sisi ni qele.

Tukuna o Kumar ni ra sa veitalanoa ena tikina oqo kei ira na daunibisinisi kei ira na lewenivanua era vakaitikotiko ena yasa ni uciwai na Sigatoka.

E kaya ni sa toso tiko na cakacaka oqo ka sa vaqarai tiko o ira na idinia me ra na mai vakayacora na nodra vakadidike kei na nodra veiqaravi ena vuku ni cakacaka oqo.

Vakadeitaka o Kumar ni gauna oqo e sa vakanamata tikoga na minisitiri e qarava tiko oya na kena tara na bai me na tarova na sisi ni qele.

A tarogi koya talega o Niko Nawaikula mai na i To ni Veisaqa ena vuku ni benu me vaka na tiki ni kaukaumea kei na lori makawa era sa laki biu tu ena uciwai oqo.
Vakaraitaka o Kumar ni sa kila tiko na tikina oqo, ia ena qarava na kena samaki na benu oqori na Minisitiri ni Qele kei na i yau Bula.

E tukuna e Palimedi o Kumar ni sa dei tikoga na nona minisitiri ena kena tara na bai me na tarova na sisi ni qele e na uciwai na Sigatoka.

Vakaraitaka o Kumar ni sa tiko talega na i tuvatuva me na vakayagataki na uciwai na Sigatoka me vanua ni gade ka vurevure ni lavo vei ira na noda.

E kaya talega o Kumar ni sa tiko na i tuvatuva me na vakarautaki na Sigatoka River Bilibili Race me dua na gauna marautaki vei keda e Viti kei ira na gone na soqo vakaoqo.