Sega ni kila na $20 na milioni

Update: 10:29AM E VAKAVINAVINAKATAKA na matanitu o Viti na sasaga e a vakayacora na matanitu o Qatar e na nodra sereki na lewe 45 na sotia ni Viti era a tauri tiko vakavesu mai vei ira na i lawalawa batikadi na Jabhat Al Nusra mai Syria, ia, e sega ga ni bau kila na kena a saumi e $20 na milioni na nodra a sereki e na Lotulevu sa oti.

E tabaka na Gulf News mai Doha na kena koroturaga ni a veivuke na matanitu o Qatar e na nodra sereki na lewe 45 na sotia ni veisaututaki ka ra a vesu mai na i lawalawa ni Syria ka semati ki Al Qaida e na Golan Heights e na vula sa oti.

E tabaki koto kina ni i tavi ni matanitu o Qatar a vakavuna na nodra sereki na sotia ni Viti ka macawa rua na nodra tauri tu vakavesura a tauri tu vakavesu me macawa rua.

Tukuni koto e na vica na i vurevure ni tukutuku ni Matabose kei Vuravura ki na tabana ni tukutuku na Inner City Press ni a sauma o Qatara e dua na i lavo.

E vakaraitaki ni tiko na matanifika e na $20 na milioni.

Ia, e na dua na i tukutuku vakamatanitu e Viti e kaya na Vunivola Tudei ni Veika ni Vanuatani o Amena Yauvoli ni sega ni kila na matanitu o Viti na nona sauma na matanitu o Qatar e $20 na milioni e na nodra sereki na lewe 45 na sotia ni Viti.

Kuria ka kaya ni nodra sereki na sotia ni Viti e mai rawa e na nona veivakadeitaki na Minisita ni Veika ni Vanuatani mai Qatar o Dr. Khalid Bin Mohammed Al Attiyah ki vua na Minisita ni Veika ni Vanuatnai e na noda vanua o Ratu Inoke Kubuabola. Kaya o Yauvoli ni veivakadeitaki ga e a vakayacora na Minisita ni Veika ni Vanuatani mai Qatar ki vei Kubuabola nira na sereki na cauravou e na loma ni 24 na auwa.

E vakaraitaka o Kubuabola ni rau a sota kei Dr Khalid bin Mohammed al Attiyah e na macawa sa oti mai Doha, ka yalataka vua o Khalid ni na raica mera na sereki vakavinaka na cauravou.

Kaya o Kubuabola ni a vakadeitaka o koya ni na taura edua na i tukutuku vinaka e na loma ni 24 na auwa, ia, e a mani vaka kina.

E a sa sauma oti e liu na matanitu o Qatar na i lavo e na nodra sereki e 13 na marama veiqaravi vakalotu

(nun) kei na nona sereki talega edua na dau volaitukutuku ni Mereke o Peter Curtis.

Na matanitu o Qatar e davo koto e na Ra kei Esia ka koto e na dua na toba lailai ko Qatar e na Vualiku ni Tokalau ni toba kei Arapea. E toka volekata na matanitu o Bahrain. Rauta ni 1.8 na milioni na lewena; 278 na kai Qatari ka ra lewe 1.5 na milioni o ira mai vanuatani era tu vakacakacaka e kea.

Kilai vakavinaka o Qatar ni dua na matanitu vutuniyau duadua e vuravura ka toka sara e cake na i vakatagedegede ni nodra vakatorocaketaki na lewenivanua e na vuravura vaka Arapea; e kilai mai na Baqe Levu kei Vuravura ni dua ka vutuniyau e na rawa-ka vakailavo. E i katolu ni matanitu e vuravura me rawa kasi kei na waiwai ka sivia na 25 na bilioni na dramu. E dua o koya ka veivuke sara vakalevu ki na vica na i soqosoqo ni batikadi vakailavo kei na veivuke tale e so.