ENA macawa qo, meda na dewa sara ena kena cakacakataki na iyaubula ni Tokatoka Hema, na Mataqali Naculawa, ena koro Tagaqe, Korolevuiwai, Nadroga/Navosa.
Me vaka ni tatadra ni Tabacakacaka iTaukei na ?Vanua Sautu, Na Viti Vinaka? sa dodonu meda veiwaseitaka na veika vinaka e rawa ni vakavotukanataki kina na tatadra oqori.
Sa toka qori e ra na veitalanoa kei Sisa Matanisiga na Manidia Liu ni Namolevu Beach Bures, a veivuke na turaga qo ena kena vakavotukanataki na otela e Namolevu. Ni wiliwili sara yani.
Taro: Kerekere ni vakamacalataki kemuni mada kei na kena navuci na vakasama ni otela qo?
Sisa Matanisiga: Vinaka na yacaqu o Sisa Matanisiga. Au turaga ni Nairai mai Lomaiviti, au vasu i Cicia mai Lau.
Au a curu ena mataivalu ena 1978, tosocake ena itutu vakamataivalu, au kerea na noqu vakacegu ena 2005. Au lai veiqaravi sara i Papiloni me va (4) na yabaki.
Au tiko mai Papiloni, au qai raica e dua na raivotu, a vakaraitaka vei au na mape kei Viti ka dua na domo au rogoca ka vaka ?Viti! Viti! Viti! yadra mada, sa dede na nomu davo koto, o ira na luvemu era sa mateni voli ga ena veivakavuvuli tani e vuqa, tucake meda mai lako.?
E basika vakatolu vei au na raivotu qo ena mataka caca ni ika12 ni Me, 2007.
Sa tiko lo voli mai lomaqu na raivotu qo, au taroga lo, se cava e lai basika sara mai kina ena yasa ni vuravura ya na raivotu, niu tu yawa mai na noda vanua.
Ia, o au mada na noqu bula e dua na ka na noqu dau kauwaitaki keda tiko na kawa itaukei.
E dau mositi au na noda bula na itaukei.
Au sa veiqaravi ena mataivalu, au veiqaravi ena noqu koro, au sa mai veiqaravi eke.
Sa veiqaravi ena veiyasai vuravura, ia e sega ni kauta laivi na kena dau mosi toka ga vei au, na noda bula voli na itaukei ena noda vanua.
Au rawa ni kaya nida bera, au rawa ni kaya nida mataboko, au rawa ni kaya nida vakasesei, au rawa ni kaya ni da vesuki, qori eso na draki ni bula au dau ilova lo voli me baleta na noda ilakolako ena gauna qo.
Ena noqu vakabauta vakalotu, na vanua qo sa vakalougatataka oti tu Kalou.
Sa tu kina na bula sautu, tu kina na vakacegu, ia eda mai wele voli ena dua na idre, dua na ivesu.
Eda sega tiko ni raica rawa, se me rai na matada vakayalo, meda raica se cava na vuni noda vesu, na cava na vuni noda bera, na cava na vuni noda sese, na cava na vuni noda vakayayamo, eda sega tiko ni kila rawa na vu ni veika qo.
Qori na veika edau mositi au, nida raica vakarabailevu na noda bula.
Au sega ni raica na Yasana, au sega ni raica na iTokatoka, au sega ni raica na Mataqali, au raica tiko ga na umatamata na itaukei.
Na logo (vakatakilakila) ni Namolevu Beach Bures, e vakatakila na draki ni bula dina a solia mai na Kalou vei ira na noda qase.
Oni na raica ena logo e dua na kalokalo bui vitu, cadra toka ga ena matasawa qo, e lai cadra toka mai wai.
E bui vitu me dusia na sala meda muria.
E yavutaki na kalokalo bui vitu ena noda yavusa na kawa itaukei, na yavusa veiliutaki se yavusa vakaturaga, yavusa va sauturaga, na yavusa vakabete, na yavusa vakabati, na yavusa vakamataisau, yavusa vakagonedau, yavusa vakamatanivanua.
Qori na vitu na yavusa kara viriviri kina na noda qase me draki ni noda bula na itaukei.
O iratou na vitu qo eratou dui turaga ga ena itavi vakayavusa.
E soli vei iratou na kaukauwa, mana kei na sau.
Na Namolevu ena vosa vakaNadroga e kena ibalebale na ?cakau raba? se ?cakau levu?.
Ni oni vakamuria mai na baravi, qo na matasawa e raba duadua me yacova na cakau.
Qori na yavu e dabe kina na yaca ni otela qo kei na kena ivakatakilakila mera vakamenemenei kina na noda qase kei na yavu ni bula era bula mai kina.
Na vakavinavinaka levu ena Tokatoka o Hema ena nodratou veivakadonui me vakatoroicaketaki na nodratou iyaubula, e dina ni keimami a tekivu ena sega, ia qo sa dua tiko na ka, na vakavinavinaka ena Baqe ni Veivakatorocaketaki ena nodratou veivuke.
Ena macawa mai qo, eda na rogoca kina na iwalewale e vakamuri me rawati kina na ilavo me tekivutaki kina na Namolevu Beach Bures.
