Rawati e na duavata

ENA vakatatabu keimami a duavata kina, sa da qai mai tauca tu na vuana e na gauna oqo.

Oqori na nona i vakamacala o Marika Bola naba 1 mai na koro ko Naivaka, Navakasiga e na Tikina ko Navakasiga e na yasana ko Bua.

E kaya o Bola ni ra a bosea vakavanua mera vakatabuya e rua na nodra cakau, ka tiko tikiva ga na koro, a ya ko cakau Nalovulovu kei na cakau o Delai.

Tomana ni ra sa lomavata kece kina ka sa mani vakavuna na kena tabu na cakau e rua oqo e na loma ni 3 na yabaki.

Kuria na turaga yabaki 65 oqo ni gauna e sa oti kina na vakatatabu, era sa qai la’ki nunu na cauravou, volitaki na sasalu, oti ga oya sa baci caka tale na vakatatabu e na cakau e rua o ya.

Ia, na i lavo e rawati mai e na i matai ni vakatatabu, e sa voli sara mai kina na i yaya ni vale.

E na gauna e wavoki yani kina na Na i Lalakai ki Naivaka e na macawa sa oti, era sa boroya tiko na nodra valevakoro na turaga ni Naivaka.

E kaya o Bola ni gauna ga e leka kina na i qila, era na baci la’ki nunu tale na cauravou me tosoi kina na veika e vinakati e na nodra valevakoro.

“Keimami sa lomavata ni gauna ga e sega kina na i yaya, e na la’ki nunuvi o rau na cakau e rua oqo, me voli mai kina na i yaya e gadrevi, oti se baci vakatabui tale.

“E na qai tara sara o rau na cakau e rua oqo, kevaka e sa tasevu sara na valevakoro, ka okati talega kina na valelailai kei na valenisili,” kaya o Bola.

Kuria ni i matai ni volivoli era cakava e ra vakayagataka kina e sivia e $15, 000, ka dua na vakacegu levu e solia vei ira na lewe ni koro, ka ni ra sega ni bau vakayagataka e dua nai lavo mai na nodra taga.

Tomana e na nona tukuna ni qo e tautauvata ni ra sa baqe tikoga e loma ni wai, baleta ni gauna ga e oti kina na i yaya ni valevakoro, era na la’ki nunu na cauravou ka voli tale mai kina na i yaya e gadrevi vakatotolo.

Sa vakavinavinakataki ira sara vakalevu na lewe ni koro ko Bola e na veivakabauti vei iratou na komiti ni valevakoro, ka toso tiko kina na tara vale me yacova mai na gauna oqo.