Rawata na siliva o Derenalagi

Update: 10:09AM ESA mai rawata na metali siliva o Derek Derenalagi e na 100 na mita (100m IT2) ena sotasota ni qito ka vakatokai na Invictus Games kei na nona vakaitavi talega ena tevetaki veleti (discus) ( IF4&IF5).

Ena 100 na mita e ciciva rawa na cauravou yabaki 39 qo na gauna e 15.55 na sekodi ka matai kina o Philippe Robert e na gauna e 16.64 na sekodi.

Ia, ena tevetaki veleti e voleka sara ni mai matai kina o Derenalagi e na nona yacova rawa na nona tevetaki veleti qo ena 35.09 na mita. O Derenalagi e a lewena tu e liu na mataivalu ni Bolatagane ni bera ni qai mai vakayalia na yavana ruarua e na Jiulai ni 2007 mai Afaghanistan. E a mavoa o Derenalagi ena nona vakasukasuka e na vanua e bulu koto mai kina na gasaukuro bulu e na nuku ka mani kacabote ka vakaraitaka na vuniwai ni sa leqa o koya e na vuku ni sa galu na kaloko ni ligana.

Ia, ea mani vakayacori vua e dua na veisele ka vakau lesu tale ki Igiladi ka laki qaravi vakavuniwai ka sega ni bau vakilai koya tu me ciwa na siga. A mani vakilai koya mai ka sa qai raica ka rogoca ni tukuni vua ni sa yali ruarua na yavana, ia e a mani vakayaloqaqataki toka na kena vakayacori na sotasota ni Paralympics mai Beijing e na 2008 ka sa gagadre kina me na vakaitavi e na veitaucici. Ena va na yabaki tarava e a qai qitotaka o koya na tevetaki veleti (discus).

E a mani vakaraitaka kina o Derenalagi e na sotasota qo e na nona raici ira na vakaitavi ena qito qo ni ra vakai dabedabe qiqi ka ra cici yavai dua ni ra vakaleqai e na vuku ni ra a vakaitavi e na i valu kei na veitaqomaki.

E kauta lesu tale vua na vakanananu ni na sotavi ira na nona i tokani era a curu vata e na valenibula. Ia ni sarava na qito qo e vakayaloqaqataki koya sara vakalevu e na tikina oya.

Latest posts

More Stories