Rawa ni qaqa tale o Tuvusa

E NAMAKA tiko o Shane Tuvusa me na qaqa tale ena veitaucici ka vakatokai tiko na ‘Blue Ribbon event’ ena yabaki qo.

O Tuvusa na cauravou daucici ni Natabua High School a rawata e 3 na koula, ena sotasota ni Coke ena yabaki sa oti. Ia, e na sasaga tale tikoga mai ko Tony Lemeki mai na Marist Brothers High School, Malasebe Tuvusa mai na Suva Grammar School kei Timoci Bolakoro mai na Queen Victoria School. Ni laurai na nodratou gauna ena 100 na mita, e totolo o Tuvusa ena 10.7 na sekodi, Lemeki e karua ena 10.86 na sekodi, Malasebe Tuvusa ena 10.89 sekodi kei Bolakoro ena 11.35 na sekodi.

Ia, e rau na vakaitavi tale tikoga o Malasebe kei Shane Tuvusa ena cicivaki kuila na 4x400m.
Nai sausau ni 100 na mita ena wasewase na ‘senior boys’ esa dei tikoga ena 10.43 na sekodi ka tekia o Banuve Tabakaucoro ena 2011.