Rawa ni qaqa: Naduva

E NUITAKA o Alusio Naduva na wigi ni timi ni Fiji Airways Fiji 7s ni na rawa ni taura nai covi ni HSBC World Sevens Series ni oti na qito mai Lodoni kei Parisi. A tekivu qito o Naduva ena sotasota ni Sydney 7s ena tekivu ni yabaki qo ka tekivu kaba cake kina vakamalua na nona i vakatagedegede ni qito me yacova mai na gauna qo.

Ia, e tukuna o Naduva ni sa tu vinaka sara tu ga na yagodratou ena gauna qo ka tu vakarau me ratou na veiraravui kei na veitimi tale eso ena macawa rua qo ka nuitaka ni rawa ni ratou na qaqa ruarua ena rua na sotasota e toka qo e matadratou.

Na timi ni Viti esa liu tiko ena 145 na poidi ka karua tiko na timi ni Sauca Aferika. Na timi ni Viti e tobu vata tiko kei na timi ni Niu Siladi, Argentina kei Sikoteladi ena sotasota qo mai Lodoni ka na vakayacori tiko ena i ka 2 ki na i ka 4 ni Jiune.