Rau qito vata na veitacini vei Nadroga

E DUA tale na veitacini dau qito rakavi erau sa vura ena timi ni Nadroga ena yabaki nikua.

O Jone kei Esala Navori erau a qito ruarua ena timi ni Nadroga ena siga Vakarauwai ena kena taqomaki na bilo na Farebrother mai vua na timi ni Tailevu ka a mai vili wi kina ena kai levu 57 kei sega ena rara e Lawaqa.

E qase ko Esala ka a qito tiko ena wigi kei na tacina o Jone ea daramaka tiko na seqeleti naba vitu ka totoka sara nona qito ena nona vakasasataki iratou tiko na i yatu e muri ni Tailevu ka vakavuna wasoma nodratou tavaiyaya.

Erau cavutu mai ena koro o Nadroumai ka a rau a veivuke tale ga ena nona a mai qaqa nodratou kalavo ni timi na Tovolea ena fainala ni T16 ena macawa rua sa oti.

E tukuna na manidia ni timi ni Nadroga o Iliavi Kato ni rau a qito vinaka sara na veitacini.

E totoka nodrau qito ka vaka tale ga kina e vica na cauravou vou ena sota kei Tailevu ka dina ga ni va neimami dauqito nuitaki era tiko ena timi lewe ya vitu ni Viti, e sega ni vakilai nodra yali me vaka ni ra cakava kece na ka ea namaki mera cakava e loma ni rara ena siga Vakarauwai, tukuna o Kato.

Erau muria tiko ga na we ni yavadra na vica na veitacini ka ra sa dara oti na i siqeleti ni Nadroga ka yaco mera matataki Viti tale ga.

Oqori me vakataki iratou na veitacini na Batibasaga, Lote kei Tokula Tuqiri mai Namatakula, Senitiki Nasave kei Aminiasi Naituyaga mai Nayawa, Meli Kurisaru, Watile Tuinagiagia, Rupeni Nasiga mai Nahigatoka, Vili Tani, Mesake Seavula, Noa Nadruku mai Namatakula, Vula Maimuri kei Ratu Aca Ratuva mai Yadua, Tiko Matawalu kei Akapusi Qera kei rau na veitacini mai Volivoli, Sakiusa Gavidi kei Ratu Naisa Vatuinaruku ka rau se qito tiko nikua.

Au nuitaka ni rau na tosoya tiko nodrau qito ka me rau dara tale ga na i seqeleti ni timi ni Viti me vaka era sa cakava oti o ira era sa liu, tukuna o Kato.